ORANJESTAD (AAN) — Hefe di Departamento di Salud Publico Sharline Koolman, a hiba palabra den conferencia di prensa di gobierno,
Diahuebs, relaciona cu e tema di Covid-19 y e “vacunathon-2”, unda el a splica, entre otro, con e vacunacion lo wordo duna, un vez cu e mester haye cu afspraak na DVZ.
Koolman a bisa cu DVG kier stimula mas tanto posible, e ciudadanonan pa atende e vacunathon e fin di siman aki (23-24 Mei).
El a expresa cu nan por compronde, y e ta algo normal, cu tin personanan tin miedo y hasta panico pa un hangua, pero e kier a encurasha pa no tin miedo y splica e persona cu ta bay aplike e vacuna cu e tin miedo di esey, y nan lo asistie pa cu esey. Koolman a acentua cu mester pensa cu e vacuna ta mas importante y cu e persona por pasa riba e miedo aki.
DESPUES DI VACUNATHON-2:
Sharline Koolman a menciona cu en principio e vacunathon aki ta dirigi na e personanan cu a tuma e prome vacuna caba, pero semper por bin un of mas persona acerca. Koolman a bisa cu mescos cu a tuma lugar den otro paisnan, na cierto momento na Aruba lo set up un vacunacion masal, pero tin cu bay “schaal af”.
“Cu afschaling nos kiermen cu bo mester bay bek na normalidad. E normalidad aki ta cu na momento cu nos ta wak cu no tin hopi hende mas cu ta acudi na e centronan di vacunacion, esey ta duna DVG indicacion cu ta ora pa cuminza baha e localidadnan unda nos ta ofrece e vacuna.
“Nos tin personal aworaki, tin biaha ta warda riba hende pa yega, y na cierto momento no por mantene esaki asina mas y mester bay bek na normalidad”, señora Koolman a menciona.
El a splica cu “normalidad” den e caso aki, kiermen ora cu e vacuna ta bay bek caminda tur otro vacuna ta wordo duna, esta na Directie Volksgezondheidsdienst (DVG), den e edificio di DVG, unda tur otro vacuna contra malesa contagioso ta wordo duna.
E vacuna contra covid-19 ta bay cay na DVG tambe y pa e motibo aki, mester bay riba afspraak.
“Si bo ta bay biaha na Juli y unda bo ta bay ta bon pa bo tuma e vacuna, nos lo stimula esey sigur, y tin chens cu si bo ta bin haci afspraak awe bo no ta haye pa mesun dia”, Koolman a splica.
El a reitera cu e “flakon” unda e contenido di e vacuna ta bin den dje, ta pa minimo seis persona y te na momento cu nan tin seis hende hunto pa uza un flakon e ora ey e afspraak ta wordo haci.
E afspraak ta bay pa e persona via email, cu e fecha y horario stipula, y por surgi lista di spera. Pesey Sharline Koolman ta haci un yamada pa bin haya e vacuna e fin di siman aki, na e centronan di vacunacion, ya cu aworaki no tin lista di spera pero e persona por cana drenta haya e vacuna, su prueba, etc.
“Despues di dia 1 di Juni, nos lo cuminza cambia e situacion, cu esnan cu pidi pa e prome vacuna lo haya un afspraak pero esaki nos no ta garantiza cu bo ta haye ni mesun dia ni e mesun siman. Depende cuanto hende keda warda y cu e lo kier vacuna despues y e por haya su mes ta warda un par di dia prome cu e bin na remarca pa haya e vacuna”, Koolman a reitera.
DVG ta cuminza pa avisa esaki pa esnan cu ta laga e vacuna pa despues, tene cuenta cu e cambio.
