ORANJESTAD (AAN) -- Minister Presidente a bolbe bin riba e caso Avestruz, den conferencia di prensa di Dialuna,
y a extende riba e investigacion cu tin den e Departamento di Infrastructura y Planificacion “DIP”.
Segun e dignatario, e caso aki ta mustra cu tin un problema hopi serio den loke ta toca otorgamento di tereno, y esaki tin un impacto grandi riba DIP.
El a sigui splica: “Y mi ta trece esaki dilanti pasobra ta tur dia nos ta haya na mi bureau, kehonan di ciudadanonan cu ta wardando riba un servicio di DIP, y no ta haya contesta. Miles di ciudadano ta wardando pa un tereno sea pa traha cas, un negoshi, of duna otro destinacion na nan tereno y DIP ta man yen cu e investigacionnan aki. Esaki ta pone un peso enorme riba e departamento aki. Tin hopi hende wardando un servicio di DIP y tin seccionnan cu ta cera ainda door di e investigacion y ni e empleadonan ni e director por yega na e documentonan, pasobra tin investigacion andando. Y pesey mi ta hopi pura pa e investigacion aki caba, pa asina DIP por funciona bon atrobe”, Prome Minister a subraya.
El a agrega cu el a tuma un decision mesora pa stop cu e corupcion cu tabata tin, y probablemente tin ainda, den otorgamento di tereno.
“Pakico tin corupcion? Pasobra tin Ministernan envolvi. Esey ta loke Ministerio Publico ta splica nos tambe cu e caso di Avestruz. E rol di e minister e kier mira”, el a acentua.
E mandatario a subraya cu e asunto aki no ta di awo. El a cuminza for di hopi tempo pasa.
“Mi ta corda tempo cu mi tabata pafo di politica, tabata tin hopi critica riba e gobierno e ora ey di MEP, cu tabata tin ex-Minister Marisol Lopez-Tromp cu hasta a bin den un WODC- Rapport cu e tabata tin negoshi cu tereno.
Despues gobierno a cambia, y a bin Benny Sevinger cu aworaki ta wordo investiga cu Caso Avestruz. Despues cu Benny Sevinger a bay, a bin Otmar Oduber cu tin e investigacion di Caso Flamingo, cu ta andando tambe, y despues a bin señora Marisol Lopez-Tromp atrobe. Ora cu mi a tuma over na October aña pasa, mesora mi a stop e asunto aki. Mi a bisa cu no ta bay tin metemento di politiconan mas den otorgamento di tereno. Y e prome cos cu mi a haci ta firma pa mandater, pa duna autoridad di firma pa tereno, na e director, bao principionan di cuater wowo, manera nan ta bisa, pues bao di e principionan di control severo y estricto, pero un politico no ta envolvi mas”, Minister Presidente a splica.
Con e sistema tabata prome e mandatario tambe a splica. El a indica cu antes tabata tin un lista cu e nombernan di kendenan ta bin na remarca pa huurground, y den un secuencia segun ki tempo a haci e peticion. E minister e ora ey ta coi un pen cora y bisa: “Esey mi ta duna, pasobra mi conoce”. Of, “Ah no, esey mi no ta worry cune mi no conoce”, “esey mi no kier pa e haya”, y asina consecutivamente. Prome Minister a reitera cu e cosnan aki a keda pa pasado desde cu el a tuma over e Ministerio.
“E listanan aki nunca mi mes a haya pa firma of aproba pasobra mi a pasa e autoridad pa e director y ningun hende por bisa ‘minister ta dicidi ken ta haya tereno, ni minister ta dicidi ki ora tereno ta sali. Mi ta convenci cu e paso aki so, ya caba ta pone un punto final tras di tur e corupcion cu tabata tin, y tur e investigacionnan” Prome Minister a señala.
