Emylane Geerman y Julio Rincon cu investigacion na DIMAS como parti di nan Tesis final como Bachelor

ORANJESTAD (AAN):  Emylane ‘Emy’ Geerman, ta un ex-alumno di Colegio Arubano, cu na 2017 a cuminza su estudio pa International Business and Management Studies (IBMS) cu un mayor den Branding na Haagse Hogeschool, na Hulanda.

   Desde Februari 2021 e ta na Aruba na Departamento di DIMAS, haciendo su Tesis final pa cu e formacion di Bachelor.

   Emylane ta haciendo un investigacion basta grandi pa asina termina su estudio, y pa asina nan por contribui tambe na nan pais, y tambe contribuyendo na e organizacion di DIMAS.

                Julio Rincon ta actualmente un studiante di Marketing na Universidad di Aruba y e tambe ta haciendo un Tesis final pa su formacion di Bachelor.

  Emylane a splica cu su investigacion ta un tiki mas compleho pasa riba e parti interno y externo di e organisacion.

  Riba e parti interno ta bay haci un encuesta cerca e empleadonan. Den 2020 tabata tin hopi cambio. Covid a trece hopi cambio den maneho y esey ta pone cu e identidad di DIMAS tambe lo mester di haci algun mehoracion, a bisa.

  Eynan ta unda e y su colega Julio ta bin hunto, cual ta e parti externo. Akinan ta bay haci un encuesta cerca e clientenan pa por saca afo si en berdad e identidad di paden ta 'match' cu loke pafo ta bisa.

  E meta ta pa bin cu recomendacionnan pa asina por mehora e servicio di DIMAS.

  El a invita comunidad di Aruba pa subi e link riba e Facebook di DIMAS. E ta tuma 5 pa 6 minuut pa contesta e preguntanan cual ta hopi facil. Nan ta na 4 idioma.

  E encuesta ta pa e clientenan di DIMAS en general, Emylane a remarca.

  Rincon a agrega cu su investigacion ta riba e satisfaccion di e consumidor y e ta bezig buscando informacion riba kico ta e opinion di e cliente tocante DIMAS y su servicionan pa asina traha riba nan y duna recomendacionnan.

  Julio Rincon a duna di conoce cu aworaki tin hopi servicio cu ta wordo haci online y esey tambe ta locual ta hayando atencion.