Opinion di consumidor:
ORANJESTAD (AAN) – Dia pa dia e costo di bida ta subi mas y mas, y ta parce cu no tin un forma pa merma esaki. Tin consumidornan cu ta asocia e aumento di prijs di tur producto den diferente supermercado, na e aumento di prijs di gasolin, pasobra casualmente ta entre Diaranzon cu Diasabra cu por constata e aumentonan aki.
Un consumidor ta keha cu e ta cumpra azeta sin colesterol pa cushina, cu su prijs un par di luna pasa tabata menos cu 10 florin, y aworaki ta casi 14 florin, y esaki apenas den dos siman.
Asina por ripara cu e prijs di galiña incluyendo hala cu tabata e parti di galiña cu tabata mas barata. Un biaha mas a bin acerca cu tin supermercadonan ta bende awacati pa casi 6 florin, cu pafo ta mustra bon pero ora di corte paden ta preto, kiermen cumpre pa bente den bari di sushi.
Carni tambe cada siman prijs ta aumenta. Lomito, por ehemplo, a bira un producto di luho caba, pa personanan di recursonan medio, kico ta pa esnan cu ta haya entrada minimo, cu sikiera Diadomingo ta desea di traha un pida lomito pa e famia.
Tin marcanan di buscuchi hopi gusta pa e consumidor local, cu tambe a bira super caro, y hasta e bonchinan cu ta bin den bleki, nan prijs a bay halto. Y asina por sigui menciona mas producto pero toch no ta gana nada cu esey, pasobra incluso esnan di canasta basico ta mucho mas caro, y ta parce cu aworaki no tin control “at all” ni riba esaki.
No papia mes di fruta y berdura. Un simple pida pampuna ta costa mas di tres florin. Banana, tambe ta bin hopi caro y hasta di mal calidad. Un consumidor a comenta cu el a conta su ruman cu ta biba na Colombia cu e ta pagando mas di un dollar pa un banana aki na Aruba, y e no por a kere. Aya cu ekivalente na un florin di Aruba, por cumpra cuater pa cinco ora cu ta un tiki caro, y den temponan di cosecha nan ta hopi barata mes.
E consumidornan ta haya cu cada bez e poder di compra ta bira menos y menos, y cu momento lo yega cu lo mester come aroz cu bonchi y webo, kizas macaroni simple, y custumbra cu na Aruba e alimentacion pa e mayoria di e pueblo, simplemente ta un luho.
