ORANJESTAD (AAN): Bon noticia pa hopi hende! Parlamentario Raymond Kamperveen di Partido RAIZ, a bin cu un mocion pa urgi Gobierno pa bin cu e posibilidad cu localnan na Aruba por ricibi pago Online Internacional.
Y e mocion a worde pasa unanimamemente den Parlamento di Aruba.
Parlamentario Raymond Kamperveen a logra cu su mocion, cu ta urgi gobierno pa sondea e posibilidad pa por introduci servicionan di ricibi pago online manera PayPal, Venmo, Apple Pay, Samsung Pay, y Cash app, a ricibi apoyo unanime den Parlamento di Aruba. Cu e mocion aki kier habri caminda pa tur persona creativo, entrepreneur, y artista local por logra bende nan producto of servicio riba un mercado internacional. Esaki lo boost nos economia y habri e caminda pa un pilar economico mas.
E turista por ehempel lo por tip un tourguide, waiter of un bartender cu djis un tap di su telefon, sin laga afo e taxista y clase trahado cu tambe por ricibi nan pago di e manera facil aki. Cu e mocion aki tambe kier hacie mas facil pa nos entrepreneurnan femenino sostene nan mes economicamente, yudando kisas e mama soltero y su yiu(nan).
