Gobierno a amplia canasta basico cu 5 producto

ORANJESTAD (AAN): Minister di Asuntonan Economico, Comunicacion y Desaroyo Sostenibel, Geoffrey Wever a anuncia ampliacion di canasta basico, durante un rueda di prensa si Gobierno.

Minister a indica cu prijs ta aumentando internacionalmente, por ehempel na Hulanda den luna di Maart, inflacion tabata na 12% y na Merca tabata 7 pa 8% di inflacion. Na Aruba, como pais cu ta importa casi tur cos, tambe ta importa no solamente gasolin y otro productonan, pero tambe inflacion. Mientras prijs internacionalmente ta subi, esaki ta nifica cu nos prijs tambe ta subi.

Gobierno ta conciente cu wholesalers ta bay aumenta prijs y esaki no ta un situacion facil tanto pa comerciantenan como pa e consumidornan. Minister a bisa cu e ta kere cu hopi hende tin dificultad pa traha cu e medionan financiero cu nan ta dispone di dje, y pesey nan a solicita DWJZ riba 11 di April pa cuminsa e proceso huridico pa e ampliacion di e canasta basico, pa asina duna esnan cu tin menos recurso un alivio e dolor financiero aki.

Minister Wever a splica cu el a haya conseho di departamentonan di Gobierno y a dicidi pa amplia canasta basico cu cinco producto. Ta trata di galiña congela, cornflakes, pindakaas, frutanan seco y congela y pampers pa baby. E canasta basico ta consisti di 1.205 producto di diferente marca y contenido. E productonan aki tin un cierto grado di alimentacion y ta necesario pa mayoria di hogar na Aruba.

Minister a enfatiza cu manera cu Gobierno por garantiza cu e prijs no ta subi desproporcionalmente y ta mantene e prijs mas abao cu ta posible. El a urgi comunidad pa sigui haci uso di App Control di Prijs, cu ta obtenible riba Google Play y App Store.