Fiscal Zamira Paesch, di Ministerio Publico:
*Mester wak cada caso individual riba su mes
ORANJESTAD (AAN) – Fiscal Zamira Paesch, a remarca den entrevista cu Matutino DIARIO, encuanto accidentenan di trafico, cu ta dificil pa bisa cu tin un contesta cu ta pas pa tur e casonan, pero mester wak cada caso individual, riba su mes.
El a reitera cu e ta investigacion hopi tecnico, unda mester wak factornan manera si e bentanan tabata habri of cera, si radio tabata cendi, si airco tabata cendi, pasobra tur ta factornan cu por tin influencia na momento di e accidente.
Tambe e condicionnan di e tempo por tin di haber, manera si a yobe, of si e caminda tabata hopi seco, di tin luz di dia of ta hopi scur. “Pues atrobe, manera mi a menciona ta un investigacion hopi tecnico. Y loke ta e decision den un caso, no mester ta e decision den un otro caso. Den tur caso apart mester wak tur e circunstancianan rond di e accidente ey. Mester wak e rol di tur partido, ongeveer”, Fiscal Paesch a reitera.
Encuanto e responsabilidad di e peaton ta pa e cana unda ta destina pa cana y cruza unda ta destina pa cruza y wak e trafico. Unda cu no tin zebrapad, e peaton tin cu wak cu e tin suficiente tempo pa e cruza e caminda. “Ta berdad cu no tin suficiente zebrapad rond di Aruba, anto mester cruza caminda pero ta sigur cu no tin trafico ta bin”, Paesch a subraya.
