Entrada temporada activo di horcan ta topa cu un mundo den suspenso total
*Solo ta alcansa su punto mas halto y seguridad mundial su punto mas abou
*Hulanda sede reunion NATO den desaroyo mundial cu DIARIO a anticipa
ORANJESTAD(AAN)—Awe Diabierna 20 di juni, solo ta alcansa su punto di mas halto den nos parti di mundo na 2025. Na Merca awe ta e inicio oficial di e temporada di verano, mientras na otro parti di mundo e ta coincidi cu inicio di temporada di horcan dia Prome di Juni.
Naturaleza ta sigui su rumbo na un mundo sumamente preocupante debi na desaroyonan serio pa cual DIARIO a alerta cu luho di detaye for di prome cu 2025.
Uno di e tareanan mas sagrado di un medio di comunicacion ta, pa informa Pueblo tocante sucesonan cu ta afecta e comunidad y sigur desaroyonan cu por contene peliger pa bienestar di comunidad di hende.
E seriedad di situacion mundial ta aumenta a base di factornan determinante cu ta dicidi riba e seguridad nacional na cada pais y asina directamente di ciudadanonan sigur den tempo moderno cu hende ta biaha pa otro partinan di mundo.
E prijs di petroleo ta duna bista cla di factornan importante di seguridad na mundo, cu durante 2025 a tuma nota di un caida spectacular di e prijs di petroleo cu a wordo spera di lo a alcansa hasta 100 Dollar pa baril for di 2024.
Ayera prijs di petroleo a cuminsa subi cu rapidez y tabata alcansa 80 Dollar pa baril, na momento cu suspenso tambe a cuminsa alcansa un punto record.
Central a bira e pregunta, si Merca ta duna sosten na Israel contra Iran den e situacion cu atrobe a escala na Medio Oriente.
E explosion di actividad di guera na Medio Oriente a bira di tal importancia, cu asistencia Mericano cu uno di e armanan mas efectivo den e confrontacion aki, a bira posibilidad ayera.
Informacionnan a indica cu e compleho Fordo, caminda e armanan nuclear di Iran ta warda, ta keda bou un cero halto. Esaki ta hustamente pa evita cu enemigo di Iran por bombardea e compleho.
Merca, sinembargo, a desaroya un bom, cu tin e capacidad pa alcansa e centro Irani, pero mester tuma e decision si e kier haci esaki.
Presidente Trump a duna di conoce cu Iran sigur ta den un problema serio y cu te awor Israel a defende su mes hopi bon. Trump a anuncia cu e lo tuma un decision dentro di dos siman.
E anuncio aki a hiba mundo poco mas cerca di e pregunta con leu mundo ta separa ainda di un confrontacion internacional serio, cu pa basta tempo ta crea suspenso serio na mundo.
Cu mundo ta prepara pa guera sigur ta e tema mientrastanto di paisnan cu ta atende e reunion di e organisacion OTAN, cu ta e tratado transatlantico na cual paisnan di Europa y Merca for di fin di Segunda Guera Mundial ta uni.
Actualmente e organisacion ta wordo dirigi pa e ex Prome Ministro di Hulanda, Mark Rutte, cu a indica cu mester aumenta e sumanan di participacion di paisnan den e organo di cooperacion militar, na cual Ukraine directamente kier uni su mes tambe.
Merca di su banda ta exigi pa e paisnan Europeo mes contribui mas na e organisacion y a wordo anuncia, manera DIARIO a indica, cu esaki ta exigi pa Hulanda tambe aumenta su contribucion pa 5 porciento di su entrada nacional.
Un asunto cu ayera a crea mas problema ya cu Spaña a indica cu e no ta acepta un aumento cu mas cu dos porciento.
Tension mundial ta presenta su mes na momento cu horcannan a cuminsa anuncia nan mes na e parti Norte di oceano Pacifico mientras cu pa e parti Atlantico na cual Aruba y Caribe ta pertenece, ainda no tabata tin ni tin indicacion di desaroyo di un sistema tropical.
Sinembargo, manera DIARIO a adverti, tur ingrediente ta presente pa mas actividad cu ta costumbra, mientras cu Aruba na diferente ocasion y sigur den caso di horcan Lenny a haya e prueba cu no por mara sistemanan di naturaleza na regla di hende.
Por tuma nota tambe cu den ultimo añanan a mira sistemanan cu ta sigui rumbo cu no ta normal pa horcannan manera sistemanan cu ta cruza di un oceano pa otro.
Con serio pasashi di un horcan for di pabou ta por ehempel pa Aruba, a keda demostra cu e peliger di Lenny, cu afortunadamente no por a alcansa Aruba, pero si a destrui partinan di paisnan cu normalmente no ta de n rumbo normal di un horcan y ta wordo uza hustamente pa evacuacion di hende na lugar mas sigur.
Informantenan ta papia di un temporada peligroso pa motibo di e hecho cu horcannan por desaroya tambe den un tempo mas cortico loke ta haci cu na momento cu alarma wordo bati, publico mester prepara su mes.
Aruba ta conoci cu e resultadonan serio di pasashi di horcannan den vecindario directo di Aruba y hasta e forma con un tormenta a cambia di rumbo y a zak baha ariba Aruba.
DIARIO debidamente ta prepara Pueblo di Aruba pa uno di e momentonan historico den cual elementonan cu por afecta e pais directamente cu peligro tambre pa bida social y economico, ta presente.
Mester tene cuenta cu e posicion actual di solo cu ta marce tambe e presencia di actividad di e Zona di Convergencia Intertropical caminda bientonan ta topa pa produci actividad climatologico.
Teniendo cuenta cu esaki mester cuminsa mira si plannan di vacacion grandi di scol cu ta den porta, ta cubri tambe medidanan cu mester por tuma pa por disfruta sin problema di beach, caminda e impacto di solo ta grandi.
