ORANJESTAD (AAN): El a keda solamente 5 dia na Aruba, pero na final prome cu el a bandona e isla, Victoria Kjær Theilvig kende ta e actual Miss Universe,
a bisa cu el a pasa dianan absolutamente fantastico. Tur cos, for di e isla te na su hendenan, a impacta cu su curazon. El a hospeda na Aruba Ocean Villas na Savaneta.
Tur hende na Aruba tabata asina hospitalario, asina caluroso, y a dune un fenomenal bon bini. Y pa su prome bishita na e isla, el a mustra di a keda agradablemente sorprendi pa esaki.
“Ademas mi por a sinti tur e amor y e pasion cu boso tin aki, y hospedando aki na Aruba Ocean Villas tabata un bendicion absoluto pa mi. E lugar aki ta yena cu oportunidad pa relaha y e isla aki hasta tin un alma. El a bin Aruba pa conecta y relaha, y a admira tur cos cu e isla ta haciendo pa medio ambiente y naturaleza tambe, y tur esey ta algo bunita pa mira,” Victoria a declara.
Fuera di esey, tur e lucha cu e certamen di Miss Universe ta haciendo awendia pa empodera tur hende muhe pa sigui bay dilanti, ta algo cu e reina di Miss Universe a admiti di a mira na Aruba tambe.
“Mi a mira hopi compania local dirigi door di muhenan, y esey ta hopi inspirado y motivador pa mira con e muhenan aki ta djis tuma accion y ta tuma tur e trabao den nan man pa asina construi un berdadero futuro exitoso pa nan mes. Mi a mira tambe cu na Aruba tin hopi ser femenino den Gobierno. Esey tabata estupendo pa mira,” Victoria a declara.
En general durante su bishita na Aruba Ocean Villas na Savaneta, el a ricibi un tour completo di loke nan ta haci eynan pa naturaleza, y a keda encanta pa mira con hendenan ta dedica nan mes pa di berdad tuma accion y pues no ta djis papia, y ta haciendo algo pa haci futuro ta un mihor lugar.
Victoria lo regresa Aruba? Aki el a contesta: “Sigur, definitivamente mi lo bin bek pa Aruba un dia como turista. Kizas un dia cu mi haya yiu, mi lo kier mustra nan e lugar encantador y tambe recomenda esaki pa mi amigo- y famianan pasobra e ta un lugar maraviyoso. Paraiso riba tera, ta loke mi ta yama esaki.”
