Pronosticonan di expertonan di DIARIO ta realidad cruel di 2023
- Mundo ta landa den turbulencia di 100 Dollar pa Baril di Azeta
- Petroleo ta deshaci di medidanan tuma pa controla costo di bida
ORANJESTAD(AAN)- Manera DIARIO cu asistencia di su expertonan local y internacional a anuncia, prijs di petroleo ta deshaci di medidanan tuma pa controla costo di bida y evita inflacion nobo, cu ya a cuminsa presenta su mes.
Mundo na e momentonan aki ta confronta problemanan serio riba tereno di produccion y comercio den productonan esencial pa sobrevivencia di hende.
Un ola nobo di inflacion, cu a yega na momento cu a pensa cu lo por sigui baha prijsnan rond mundo, manera DIARIO a adverti for di su inicio, a percura pa oficialmente wordo anuncia cu prijs di petroleo a conoce su aumento mas halto na 2023.
Manera DIARIO a mustra siman pasa, companianan productor mas grandi di petroleo na mundo, a sigui aumenta nan prijs. Si siman pasa, ainda por a mira algun compania cu no a alcansa 90 Dollar pa baril, e siman aki practicamente tur e companianan mas importante pa indica prijs di petroleo oficialmente, ta acercando 100 Dollar pa baril, mientras na cierto compania ya e prijs aki a bira realidad.
E impacto di mas grandi cu e desaroyo aki tin pa mundo ta, cu na momento cu mundo a pensa cu a base di medidanan pisa e por baha inflacion, awor inflacion ta bolbe subi cu resultado cu mundialmente tur prijs lo mester cuminsa subi a medida cu e petroleo cu a wordo produci na un prijs mas halto, wordo pone riba mercado internacional.
Na Aruba mes por a nota con awa y coriente, cu ta e basenan di costo di bida pero tambe pa haci negoshi, ta subi y asina ta afecta e placa cu hende tin pa sobrevivi.
Tur informacion cu DIARIO tin na e momentonan aki ta mustra, cu Aruba mester ta prepara pa prijsnan mas halto y cu lo sigui subi den e proximo lunanan aki.
Un temporada nobo, domina atrobe pa inflacion, ta anuncia su mes na mundo cu na Juni a scrap practicamente e peliger di un recesion despues cu por ehempel Merca tambe a tuma medida importante pa atende cu inflacion.
Sinembargo, tur e pronosticonan aki y e medidanan cu a wordo tuma a base di e resultadonan pa contraresta mas aumento di prijs mester a produci, a perde validez y mundo ta prepara su mes oficialmente awor pa prijsnan mucho mas halto.
E ola nobo di inflacion, manera expertonan ta splica, lo tin un impacto mas pisa cu e ola di inflacion na 2022, pa motibo cu na 2023, ainda e costo di bida no a bolbe baha na mayoria di paisnan y alcansa e nivel cu tabata tin prome cu 2022 a deshaci di pan riba mesa pa hopi hende.
Informacionnan internacional ayera tabata carga cu e expectativanan sigur na Europa, caminda ya varios pais a declara di ta den estado di recesion. E hecho cu na Europa mas pais cu otro parti di mundo a declara cu nan ta den estado di recesion ta, segun informantenan, cu paisnan Europeo sigur esnan afilia na Union Europeo, ta wordo goberna cu reglanan estricto riba tereno financiero, economico y monetario loke ta haci cu continuamente nan cifranan por goza validez aceptabel.
E momento cu ayera oficialmente a wordo declara cu azeta a alcansa su prijs mas halto di 2023 y e menasa di Rusia y Saudi Arabia pa mantene nan produccion abou, alarma grandi a wordo bati manera DIARIO a anuncia na su lectornan.
Na Europa, centro di negoshi petrolero Brent, ya ta un hecho cu prijs di azeta di Brent, lo pasa 100 Dollar y hasta por wordo asumi cu esaki a socede.
DIARIO ta den contacto cu su informantenan riba diferente tereno pa mira kico e shock nobo lo nifica prome cu dianan di fiesta manera DIARIO a anuncia como e matutino di Pueblo di Aruba.
Sector Bancario mundial mescos cu sector financiero y comercial, ta completamente prepara pa e resultado dramatico cu e ola nobo di aumento di prijs mundial produci pa petroleo, por tin pa comunidadnan rond mundo pa medio di inflacion cu lo afecta mundo, cu no a haya oportunidad pa coregi inflacion 2022 manera tabata e intencion.
