Presidente di Parlamento Edgard Vrolijk:
ORANJESTAD (AAN): Presidente di Parlamento, Edgard Vrolijk a indica den entrevista cu DIARIO cu Aña Parlamentario 2022-2023 tabata un aña cu nan a cuminsa cu proyectonan y cierto trabaonan, entre otro a enfoca riba transparencia.
Ora di subi riba e website di Parlamento por wak tur documento di biaha. Manera cu nan drenta Comision Central, mesun dia nan ta riba e website. Tur hende por wak e mocionnan cu wordo pasa durante e reunionnan, a bisa.
Vrolijk a declara cu Parlamento ta enfoca pa un di e puntonan di critica mas grandi cu tabatin cu e documentonan no tabata publico. Aworaki nan ta publico pa tur hende.
Aworaki e otro enfoke cu a finalisa cu ne ta cu desde e proximo reunionnan cu e ministernan presenta algo, pueblo tambe por wak'e. "No tin nada di sconde y esey ta e punto di salida di transparencia", a expresa.
Presidente di Parlamento a sigui bisa cu nan a sigui cu e enfoke pa renobacion. Mester a para un rato. Mester a keda cla cu papeleonan cu companianan pa cuminsa durante e reces. Ora reunion cuminsa tin cu para y na December lo sigui cu e renobacion total di e cara di e edificio.
Lo tin cambio di bentananan, verf nobo, entre otro. Trabaonan grandi lo wordo haci y den presupuesto 2024 tambe ta enfoca pa locual ta edificio patras. Tabata un aña di preparacion pa esaki y banda di esaki lo sigui traha riba locual ta independisacion di Parlamento, a indica.
