Parlamento Hulandes kier schrap mas belasting riba azeta den porta eleccion
- Prinsjesdag celebra cu un Miljoenen Nota cu cambio politico tropical
- Careda politico pa evita desaster social Hulandes cu belasting gasolin
ORANJESTAD (AAN)- Awe ta Prinsjesdag na Hulanda; pues e dia grandi cu Reino ta reuni pa scucha di Su Mahestad Rey Willem Alexander, kico Pueblo di Reino Hulandes por spera den e aña venidero di Parlamento.
Pues awe no ta solamente e futuro di Hulanda como pais ta wordo presenta, pero tur plan cu Reino tin pa tur su ciudadanonan.
E origen di Prinsjesdag ta wordo busca den e costumber di celebra cumpleaños di Rey Willem V. Pakico Tercer Diamars di September a bira e fecha pa apertura democratico di aña di Parlamento, a keda desconoci.
Mescos cu na Aruba siman pasa Representante di Rey na Aruba, Su Excelencia Gobernador Alfonso Boekhoudt, a presenta plannan 2023-2024 di Gobierno di Aruba, awe Su Mahestad Rey Willem Alexander lo presenta e planan di gobernacion di Reino.
E celebracion di awe tin un nificacion special na 2023, pasobra na prome lugar e lo nifica cu den e discurso di Trono, lo por wordo considera un Testament di e ultimo Gobierno Mark Rutte.
Eleccion na final di November 23 na Hulanda lo dicidi kende lo ta sucesor di Prome Ministro Hulandes y di Reino Hulandes pero e realidad di calidad di bida na Hulanda awe.
Ta despues di e discurso, Gobierno Mark Rutte lo entrega e Presupuesto di Reino 2023-2024 na Parlamento di Hulanda, cu ya ta na haltura cu na forma urgente mester atende e presupuesto di 2024 di Hulanda cu ta den un problema financiero y social serio.
Na 2023, e Presupuesto Hulandes tambe lo duna tur indicacion cu Gobierno Hulandes a wordo afecta cu loke nan ta cualifica (cu nan actitud pero sin papia directamente) como un malesa politico tropico.
Si semper Gobierno di Hulanda, a uza inabilidadnan di politiconan na e parti Caribense di Reino Hulandes y hasta ta pusha Gobierno actual di Aruba den un posicion politico dificil, awe historia di Reino ta conoce e momento, cu na careda Gobierno Hulandes mester reuni pa cambia su presupuesto pa 2024, cu por considera Testament di Gobierno Mark Rutte, ya cu e ta contene e resultado financiero di gobernacion Rutte for di 2010, ora Rutte pa prome bez a acepta eleccion.
E situacion social na Hulanda ta asina tristo, cu un mayoria den Tweede Kamer kier preveni cu aumento di belasting riba prijsnan di gasolin y diesel na Hulanda for di Prome di Januari 2024, lo nifica un aumenta cu 21 cent pa liter.
Manera na diferente ocasion DIARIO a trece dilanti, e situacion social na Hulanda ta dramatico cu Un Miyon persona cu ta biba den situacionnan social inaceptabel.
Esaki ta motibo cu partidonan nobo manera BoerBurgerBeweging y e politico Pieter Omzigt, a haya un popularidad cu ta haci cu segun encuestanan prome cu el a forma un partido, ya Omzigt por considera cu el a gana eleccion.
E cifranan cu ta dicidi pa gobernacion financiero di Hulanda y e Prepuesto di Gobierno di Reino Hulandes (pues pa Aruba tambe) ta wordo entrega awe dor di Ministro di Asuntonan Financiero Hulandes, Kaag, cu tampoco lo bolbe den un Gobierno nobo y ta uno di e hopi politiconan Hulandes cu a bati retirada na momento di critica enorme di Pueblo Hulandes riba e ultimo gobernacionnan di e pais.
E realidad Hulandes ta bini dilanti den e cifranan di gobernacion cu Mark Rutte a entrega pa 2024, pero cu por wordo considera su Testament na tur forma. E cifranan aki ta resultado di su maneho di uno di e paisnan mas rico na mundo, pero ta papia di hamber y miseria social como uno di e problemanan mas serio cu ta afecta Pueblo Hulandes.
Prijs di cas, di cuminda, di bida general a subi di un forma cu a crea pobresa y condicionnan inacaptabel. Por lo pronto no tin cambio na bista.
DIARIO a publica cu luho di detaye e medidanan financiero cu Gobierno Rutte a tuma na Hulanda un par di luna pasa y cu a causa cu awe hopi Hulandes tin problema pa come.
Por asumi cu despues di eleccion lo tin cambio grandi den e plannan cu awe Mark Rutte ta entrega como su vision na Parlamento Hulandes, cu ya a mira miembronan actual di Parlamento, dicidi cu nan ta subi lista di partidonan nobo.
Un Prinsjesdag historico ta marca sucesonan di dia awe na Hulanda, caminda aparentemente Gobierno Hulandes a contagia cu loke nan ta considera como mal maneho tropical.
Na ultimo momento a logra cera e presupuesto cu awe lo wordo presenta pa reuni y dicidi con ta deshaci di medidanan cu kier a tuma y cu lo causa hamber y miseria na Hulanda.
Awe ta keda demostra cu DIARIO no ta practica mentira ora e bisa cu Prome Ministro Wever-Croes a logra loke Mark Rutte no a logra!
