ORANJESTAD (AAN): Prijs di gasolin rond mundo ta den un trend di caida, incluyendo na Merca unda e siman aki prijsnan a baha pa prome biaha na un nivel mas abao desde Februari di 2023.
E caida den prijs lo bay sigui pa e siguiente lunanan di invierno. Esaki ta algo cu ta pasa den temporada di frieu, ora cu varios refineria ta regresando back despues di a pasa den epoca di mantenimento, y ta cuminsa suministra mas combustible riba mercado.
Prijs mas abao di gasolin ta wordo sinti tur caminda, no obstante cu mercado internacional di petroleo ta keto bay den categoria di $80 pa bari.
E pronostico ta cu prijs di gasolin lo keda abao pa awor te cu fin di aña. Sinembargo tin di keda vigila, si acaso e prijs di combustible cambia si acaso e guera entre Israel y Hamas bira mas amplio.
Prijs na Aruba: Mientras tanto e siman aki, Minister di Asuntonan Economico, Comunicacion y Desaroyo Sostenibel ta anuncia e prijsnan nobo di benta di combustibel entrante awe 8 di November 2023.
Gasoline unleaded-premium lo baha cu 29,3 cen, pa wordo bendi awor na 248,6 cen pa liter.
Diesel Low-Sulphur lo baha cu 13,0 cen, pa wordo bendi awor na 247,8 cen pa liter.
Kerosin lo baha cu 12,1 cen, pa wordo bendi awor na 225,9 cen pa liter.
E prijsnan ta inclui BBO/BAZV/BAVP.
