Paul Croes no kier a bin Corte
ORANJESTAD (AAN): Diamars mainta Hof di Corte Superior a cuminsa atende e apelacion di Paul Croes contra e sentencia di 2 December 2021, caminda Hues a ordena cu Paul Croes ta worde haya culpabel di labamento di placa y cu e mester paga 183 mil Florin. Si acaso Paul Croes no paga e lo mester bay 1 aña sera den prison.
Paul no a presenta: Diamars mainta por a constata cu Paul Croes no a presenta. Su abogado nobo, mr. D. Croes, a bisa Hues cu ayera Paul Croes a cumpli aña y Paul no ta desea di bay Corte. Señora di Paul Croes, si tabata presente.
Regie Zitting: Ta asina cu Hof di Corte Superior a bisa cu ta un “regie zitting” o sea e tres Huesnan di Hof kier sa si abogado mr. D. Croes tin peticionnan cu e kier promer cu Hof fiha un fecha pa tratamento di e caso. Hof a mustra cu tin un cantidad di corespondencia di documentonan cu nan a haya caba.
Kier mustra cuanto placa di regalo a haya: mr. D. Croes a pidi Hof pa duna un chens pa caba di pidi tur e hendenan cu a asisti na e casamento di Paul Croes pa bisa cuanto placa nan a regala Paul Croes. E abogado a splica Hof cu esaki ta un proceso hopi fastioso pasobra ta un tradicion na Aruba cu ora di casamento, invitadonan ta duna envelop cu placa.
Awor ta fastioso pa pidi cada hende pa bisa cuanto placa a duna. E abogado ta haya cu esaki lo por splica cu no tabatin labamento di placa. Na opinion di e abogado, e caso aki tin casi 10 aña andando y ta haya cu si warda algun luna mas, pa otro aña lo por tin mas claridad.
Negociacion pa areglo di pago a tranca: Hof a bisa cu por a compronde cu mr. D.Croes, ariba peticion di Paul Croes, a acerca Ministerio Publico pa negocia pa yega na un areglo di pago. E abogado a bisa Hof cu entre April 2023 te cu recien a purba pero no a yega na un areglo.
PG ta contra: Procurador General (PG) a reacciona riba e peticion di mr. D.Croes. PG a bisa cu for di April 2023, a pidi e abogado kico e kier pa sosode pa ta cla pa e caso. Awor na November 2023 ta scucha e abogado ta pidi pa duna un chens pa pidi esnan cu a regala placa na casamento di Paul Croes. Na opinion di PG, ta casi 10 aָña a pasa y ainda abogado kier pa scucha e hendenan. PG a pidi Hof pa rechaza esaki.
Abogado mr. D. Croes a bisa Hof cu awor den “regie zitting” ta e oportunidad pa trece claridad cu e placanan cu Paul Croes a haya ta legal y no di labamento di placa.
Hof a bisa cu e ta bay studia e peticion y reaccion di PG y dia 27 November pa 1:45’or di merdia lo tin decision.
