Minister Geoffrey Wever:
ORANJESTAD (AAN): Minister di Finansa, Economia y Sector Primario Mr. Geoffrey Wever ta informa cu e presupuesto 2026 di Pais Aruba a wordo manda pa College Aruba financieel toezicht (CAft) pa conseho. Despues cu gobierno ricibi e conseho di CAft, e presupuesto 2026 lo wordo entrega na Raad van Advies cu tambe lo inclui e reaccion riba conseho di CAft. Ta premira cu Parlamento di Aruba lo ricibi e presupuesto 2026 prome cu 1 di september 2025 manera ley ta prescribi.
E presupuesto 2026 ta e prome presupuesto cu Gabinete AVP-FUTURO cu tin como e punto di salida full e Programa di Gobernacion 2025- 2028. Meta di Programa di Gobernacion 2025- 2028 ta cu lo cumpli cu normanan di presupuesto, pero cu lo usa e presupuesto di Pais Aruba pa mehora poder di compra, stimula comercio y hisa calidad di bida riba tur tereno di desaroyo. Dentro di poco gobierno lo elabora mas riba e contenido di e presupuesto 2026.
Despues cu conseho di minister a aproba e Meibrief 2026 presenta pa Minister Wever, Directie Financien hunto cu Directie Wetgeving en Juridische Zaken a compila e prespuesto 2026 cu ta e ley mas importante den gobernacion di nos pais. E Meibrief ta contene entre otro e cuadro financiero, e nivel di gastonan y entradanan pa 2026 y prioridadnan di maneho di Gabinete AVP- FUTURO.
Minister di Finansa, Economia y Sector Primario Mr. Geoffrey Wever ta gradici coleganan ministernan y tambe Directie Financien y Directie Wetgeving en Juridische Zaken pa hunto traha pa entrega e presupuesto 2026 na tempo.
