E cambio real cu e Hulandes tabata kier no a bira realidad Hulandes
- Hulanda kier un Gabinete Schoof nobo of un Gabinete Wilders?
- Partidonan nobo no a honra e anhelo democratico di e Hulandes
ORANJESTAD(AAN) Pa por atende cu e situacion cu ta desaroya actualmente den Reino, e momento a yega pa realmente pone Statuut den practica y tene na consideracion cu e ta busca bienestar di tur miembro di Reino Hulandes, incluso Hulanda.
Pa straño cu esaki por parce, e Pueblo di Hulanda tin mes derecho cu e Pueblo di partinan di Reino den Caribe, pa basa su felicidad riba loke e ta considera su felicidad.
DIARIO na un momento sumamente importante den Reino, ta den contacto continuo cu su colaboradornan den Reino pa asina por tene e Pueblo di Aruba bon informa, di loke mester spera y por spera den futuro di e relacionnan entre Hulanda y e otro paisnan den Reino Hulandes.
Pa cuminsa mester realisa, cu ora papia di Reino ta papia di paisnan autonomo cu ta forma un Reino cu tambe conoce e situacion special di islanan BES, resultado di e restructuracion di Antia Hulandes.
Pues Hulanda tambe ta un pais autonomo, cu e derecho di un Pueblo pa busca su mihor destino a base di su propio identidad local y loke e ta considera su bienestar y felicidad.
Democracia no ta un palabra riba papel, pero ta realidad di cada persona cu nace na un pais democratico.
Ora atras den e ultimo añanan, por mira claramente con e Pueblo Hulandes a lanta para pa busca solucion pa su propio problemanan riba cual e tin mas cu derecho.
E Hulandes ta un luchador silencioso. Hulanda ta un pais, cu a nace for di e conkista di laman. Asina e historia real di e Hulandes ta cuminsa.
E Hulandes a lucha contra elementonan natural increibel y a crea su pais dor di vence laman cu su Afsluitdijk. El a cambia hasta e awa di laman.
Na su parti Occidental, el a conkista terenonan di laman, pero tambe a keda e porta nautico pa Europa, cu a bira uno di su ingredientenan principal.
No ta sin mas e Hulandes a bira e pais rico di Europa pero na mes momento un pais cu un base social, cu ta haci cu como capitalista , e tin un legislacion socialista, cu ta duna derechonan social na hende y francamente a bira su problema principal.
Pa esaki ta realidad, naturalmente e Hulandes mester paga belasting pero cu e pensamento cu e por yuda otro, pero yuda su mes sobrebibi lugar.
E kier su cas pa e biba aden manera e merece na su lugar pa su aporte di belasting.
E kier biba como Hulandes na su pais Hulanda, segun su costumbernan, papiando su idioma(nan) y dialecto di su region.
Hulanda realmente a bira un paraiso pa hopi habitante di otro paisnan na mundo, caminda no tin lugar pa hende sinti su mes hende.
Hulanda mester a acomoda tambe resultado di su propio eror como participante na colonialisacion, pero e ta paga su debe y hasta por mira cu poblacion oficial Hulandes pa un parti importante ta resultado di migracion.
Awor e Hulandes kier un Hulanda cu ta realmente Hulanda y e ta entrega su persona e prueba cu Hulanda ta pa e Hulandes por biba trankil tambe.
DIARIO a transmiti e anhelo pa cambio cu a bira sumamente fuerte prome cu pandemia a ataca y cu a resulta den partidonan nobo cu awe no tin forza mas pero cu no a honra loke e Hulandes tabata y ta busca, cu ta un Hulanda pa felicidad di e Hulandes tambe.
Gobierno Schoof a cay. Pero Gobierno Schoof por bolbe?
Un pregunta cu ta surgi si papia cu e Hulandes cu a na forma cu no a laga lugar pa pregunta, a vota pa Wilders dicidi kico ta pasa na e pais.
Wilders ta e politico cu te awe a keda cu e sosten di mayoria di e Pueblo Hulandes, cu no a ricibi satisfaccion real den logronan di Gobierno Schoof.
E pregunta ta awor. Kende lo ta e proximo dirigente Hulandes? Lo acepta Schoof pa bolbe dirigi e pais si e situacion actual prolonga su mes y Wilders ainda por conta cu mayoria di voto.
Kico Pueblo Hulandes kier pa loke ta e Union Europeo, cu tambe ta na discusion? Asina por sigui cu mas y mas pregunta, pa un Pueblo cu kier su un cas pa e biba aden y leynan social cu ta deshaci di su problemanan.
E relacion den Reino a drenta un fase nobo. Schoof a trece e mensahe cu placa a caba y awor ta “Steunend op eigen kracht” pa tur pais den Reino.
Esaki sigur ta crucial den e tempo nos dilanti. Pasobra con cu bolter e asunto, hecho ta keda cu “Steunend op Nederland”a crea hasta hopi politico na tur pais Hulandes den Reino, cu mester ta prepara pa e confirmacion di e exigencia pa cambio den e proximo eleccion na Hulanda!
