Delegacion di Corte Comun di Husticia a bishita Trinidad & Tobago pa despedi Presidente di CCJ

ORANJESTAD (AAN):  Siman pasa, un delegacion di Corte Comun di Husticia (GHvJ),

forma pa Presidente di Corte Mauritsz de Kort y Consehero Superior di Politica André Steg, a bishita Trinidad & Tobago pa conmemora despedida di Señor Adrian Saunders como Presidente di Caribbean Court of Justice (CCJ). Señor Saunders, cu tambe tabata Presidente di Caribbean Association of Judicial Officers (CAJO), ta sali for di su cargo despues di un carera largo y impresionante.

            Aunke GHvJ no ta den hurisdiccion di CCJ, como miembro di CAJO e tin un encuentro cerca cu e desaroyonan den comunidad legal di Caribe. Via e red aki, e Corte ta haya bista valioso tocante e desaroyo y desafionan concreto cu ta existi den praktijk legal den e region, y con e por duna solucion for di un perspectiva local Caribense. Señor Saunders semper a mustra un aprecio grandi pa GHvJ y su salida tabata un ocasion apropia tambe pa un despedida personal den nomber di Corte.

            Durante e bishita, tabatin tambe un encuentro entre Presidente di Corte y Arzobispo Jason Gordon, cu ta actua actualmente como administrador apostolico di Diocesis di Willemstad. Durante nan encuentro, nan a trata e hecho cu tanto GHvJ como e diocesis tin responsabilidad pa e seis islanan anterior di CaribeHulandes. Nan a papia tocante e interconexion special aki y di e bunitesa y desafionan social unico di cada un di e islanan.         

            E bishita ta refleha e compromiso continuo di GHvJ pa cooperacion den region Caribense y e reconocemento pa socio importante cu ta traha pa ley, husticia y cohesion social.