Proceso hudicial Benny Sevinger no por bira otro Fondo Desaroyo Nobo San Nicolas - *Sistema electoral y participacion Parlamento ta wordo uza contra regla democratico - *Problemanan AVP y Husticia no por skirbi leynan nobo den Estado di Derecho Aruba
ORANJESTAD (AAN) — Caso Avestrus no a cay for di cielo. Caso Avestruz a nace for di e hecho cu autoridad a haya base pa investiga si por papia di corupcion y otro delitonan penal den e forma cu tereno, cu ta parti di suelo di Aruba, a wordo atende dor di Benny Sevinger como Ministro den e Gabinetenan di Mike Eman.
E sector independiente di mundo politico segun Trias Politica, cu ta Husticia, a cuminsa cu un investigacion hopi tempo prome cu a bira conoci cu na Juni 2021 Aruba lo a bay urna electoral.
E proceso a wordo hiba manera ta atende tur proceso y Benny Sevinger a bira sospechoso den un investigacion realisa a base di Leynan di Aruba y dor di e Instancia encarga cu investigacion penal na Aruba, cu no ta propiedad di ningun partido, di ningun politico.
Ora tuma nota di e investigacion por mira relacionnan den hopi sentido. Autoridad mester haci su trabou den un democracia cu no conoce rango, ni titulo pero ley na un pais cu a lucha pa tin su propio Ministerio Publico.
Na momento cu Betico Croes a exigi pa Ministerio Publico ta den man di Aruba y no parti di un base di cooperacion manera Corte di Husticia, el a deshaci di e posibilidad cu influencia cu no ta na fabor di Aruba como pais of di Arubianonan, por wordo uza den proceso penal.
Den e Caso Avestrus, cu no a cuminsa na vispera di eleccion pero si ta basa riba un asunto cu por perhudica e proceso democratico di Aruba, autoridad a uza ley pa haci su investigacion.
Si esaki no tabata e caso, ya Benny Sevinger y tur otro acusado por a bringa e proceso cu sosten y sali gana.
Atende asunto di tereno contra ley, contra regla ta nifica cu ta habri porta pa mata democracia. Den caso di corupcion politico, e persona cu por paga pa corupcion ta haya derecho cu e persona cu no por pone placa of cualkier prestacion riba mesa, ta menos cu e persona cu tin placa pa pone riba mesa y logra un derecho cu e no tin legalmente.
Nos tuma e caso di permiso, cu tambe ta uno di e casonan di AVP, nos ta mira e peliger grandi cu contra regla hende ta haya permiso loke tin resultado directo pa Aruba.
Aruba no ta propiedad di AVP ni di integrantenan di AVP cu no tin derechonan exclusivo na Aruba, aunke na hopi ocasion cu nan kier crea.
Awe Aruba, mescos cu tabata e caso penal Fondo di Desaroyo Nobo San Nicolas ta wordo cubri cu boca grandi, cu sentimentonan, cu asuntonan cu ta pone presion riba e sistema hudicial.
E proceso electoral a wordo uza dor di AVP pa yena cayanan, drenta casnan di votadornan y pusha Aruba den un estado emocional pa vota pa un persona den prison.
Parlamento a wordo uza dor di AVP y awe ta funciona cu 20 miembro y no 21 pasobra AVP kier mustra su poder hasta riba e terenonan mas sagrado di Aruba.
Kico por pasa cu emocionnan falso a wordo demostra cu e Caso Fondo Desaroyo Nobo San Nicolas, cu na su final a habri wowo di Aruba. Huez a sentencia tres Ministro di AVP y nan a apela nan caso mientras Ministerio Publico a apela e hecho cu Henny Eman a haya libertad pa motibo di estadonan di cuentanan anual di Aruba.
Ta na final di e caso Aruba a keda cu un situacion cu hamas e por lubida. Riba beach publico e caso penal Fondo Desaroyo Nobo San Nicolas a muri. El a hoga y perde for di pantaya pa caminda habri pa Mike Eman den por a subi plataforma y uza BBO pa gana eleccion.
Awe por a nota con Aruba ta wordo confronta cu informacionnan cu ta pone Ministerio Publico atrobe na berguensa pa defensa di Benny Sevinger.
Aruba ta wordo uza den un caso, cu si e ta berdad, ta contra interes y bienestar di Aruba cu si Caso Avestrus ta berdad, a bira victima politico di AVP.
Aruba mester di paz y trankilidad. Aruba mester por sigui cana y no por depende di abuso di status di politico y presion politico riba husticia.
