ORANJESTAD (AAN): E grupo local di Fundacion Fiestas Patrias, ta organizando actividadnan pa cu e bicentenario nacional di Peru.
E fundacion local a haya haya autorizacion pa usa e logo di e Bicentenario, cu ta un señal suficiente pa e Institucion emergente aki den Caribe, ta habri porta pa actividadnan rond di nan 200 aña di independencia nacional.
Nan ta leu di nan pais, pero cu hopi civismo, nan ta prepara nan actividadnan na Aruba cu tur tipo di actividad cumpliendo cu tur tipo di protocol y tambe regla di salud.
Nan lo bay ta hisa bandera Diaranson mainta 28 di Juli 2021 pa 10:00 am na Wilhelmina Park. Esaki lo ta djis un ceremonia breve.
Diaranson 28 Juli pa 7:00 pm mes lo bay tin un Santo Sacrificio di Misa na Pro-Catedral San Francisco na Playa, unda lo bay haci oracion pa conmemora e 200 aniversario di Independencia di Peru, y tambe pa tur esnan cu a fayece debi na e pandemia na peru.
Fuera di esey nan a organiza Diadomingo cu a pasa caba actividad na Centro di Bario Dakota, unda tabatin un festival gastronomico Peruano, cu tambe weganan di futbol masculino y femenino, cu participacion di team di Alianza Lima, Universitario, Seleccion di Peru y Chile, y tabatin trofeo pa e participantenan. Tabatin Mariachi Perla di Aruba cu a anima tur cos bunita asina, y musica di Francis Jacobs y e Duque.
