Presidente di SAC hopi satisfecho cu un tremendo fin di siman di fakkel

ORANJESTAD (AAN)—Darren Van Ommeren, presidente di SMAC, a expresa den entrevista cu DIARIO,

cu nan a ranca sali cu un tremendo fin di siman, Diasabra, cu Fakkel a cuminza.

Van Ommeren a comenta cu nan cuminza 8’or en punto, y manera semper tin cosnan ta pasa cu bo no por evita.

Esaki ta ora cu grupo Champagne a haya dificultad cu su trekker pero nan a drecha esaki pa por a subi caminda.

“Pero esey a haci cu nos mester a tranca e parada un rato pa duna nan espacio tambe, pasobra na dado momento nos a cuminza manda tur grupo y a bira un tiki dificil pa por a sigui cana.

Pero asina nan a keda cla nos a hinca nan aden y nos a sigui cana. Pero el a bay bon, e piece tabata bon, y nos a yega pabao djis 20 minuut di diferencia di loke nos tabata calcula pa e cabes yega.

Mi por bisa cu e tabata un fakkel tremendo y vooral ora bo ta haya relato di polis y bo tende como organizacion cu tabata tin cero detencion, y hasta e maneho bao influencia tambe a reduci di 11 na aña 2024 na 8 na 2025. Esaki ta yena bo cu satisfaccion y bisa cu di un manera of otro, ta haciendo un bon trabao y hendenan ta conciente cu nan por a disfruta na un manera sano”, Van Ommeren a expresa.