ORANJESTAD (AAN): Presidente di Raad van Advies, David Kock a bishita Gobernador Alfonso Boekhoudt relaciona cu e reunionnan di consulta den cuadro di formacion di e gobierno nobo.
Kock a splica cu Raad van Advies tin un rol special den esey y cumpliendo cu esey, nan a reuni cu Gobernador riba eleccion, consecuencianan, plannan, etc.
El a agrega cu e reunionnan di RvA cu Gobernador semper ta bay bon. RvA tin un papel di consehero. RvA no ta dicidi nada. Nan ta duna conseho y tin ora Gobierno ta sigui e consehonan. Tin ora no. Pero nan rol no ta bay mas leu cu esey.
RvA ta mustra riba problemanan cu tin, con por soluciona nan. Pero gobernacion y maneho ta algo di e politiconan. Esey no ta un tarea di Raad van Advies, a remarca.
David Kock a agrega cu Raad van Advies no ta mara na gobierno of na un signatura politico. RvA ta duna e conseho cu ta kere ta miho. "Pero si bin un cambio, toch no lo afecta e funcionamento di e raad den absoluto", el a declara.
