Awe tin e prome charla na Biblioteca Nacional tocante Literatura di Gabriel Garcia Marquez

Clifford Rosa, director Fundacion Rancho:

ORANJESTAD (AAN) – Fundacion Rancho ta liderando aworaki un agenda cultural entre Guajiro y Arubiano, cu ta un continuacion di un presentacion cu Aruba tabata tin na Riohacha, La Guajira, y awo ta toca Rio Hacha, La Guajira pa ta na Aruba.

            Asina Clifford Rosa, Director di Fundacion Rancho a duna di conoce den un entrevista cu DIARIO.

Clifford a menciona cu den cuadro di esaki, Fundacion Rancho ta organizando un serie di evento p’asina ey tin diferente presentacion.

            Clifford Rosa a elabora tocante kico tur nan a haci p’asina yega na clausura di aña 2024, haciendo su eventonan na un manera creativo, pasobra tur hende sa, fondonan ta haci falta. Sin fondo ta dificil pa eherce diferente di e actividadnan aki. “Pero nos ta haci nan toch, y nos ta keda cu e confianza cu e subsidionan cu nos por haya por yuda nos cubri, no esakinan so, pero mirando e planificacion cu nos lo tin pa 2025”, Clifford Rosa a señala.

            El a agrega cu pa 2024, yegando na fin di aña, e fundacion ta purba clausur’e na un manera festivo, unda cu nan ta bay un anochi cu cuminda di temporada di Pasco, sin laga afo e musica di gaita di e bario.

            Clifford a indica cu esaki ta cuminza dia 14 di December for di 6’or di atardi caba, unda comunidad ta bon bini na Fundacion Rancho, riba e Plaza Rancho, cu ta bay wordo transforma den un anochi alegre, unda ta bay clausura aña 2024.

            Ya caba dia 10 di December tabata tin un presentacion di Carmen Camargo di Riohacha, La Guajira, cu como Fundacion Rancho nan tin hopi aña trahando hunto, y esey ta loke nan ta haci tambe den e parti di intercambio cultural y comercial entre Aruba-La Guajira y La Guajira- Aruba.

            Awe, Diaranzon 11 di December, ta bay tin e prome charla na Biblioteca Nacional unda e dama invita, Maria Isabel, ta bay presenta literatura tocante Gabriel Garcia Marquez, y dia 12 di December na Fundacion Rancho mes, ta bay tin otro combersatorio y e presentacion di Maria Isabel, tambe riba e topico di Gabriel Garcia Marquez.

            “Di tur esaki mi por bisa cu nos tin un siman yena cu evento, y specialmente pa nos hende muhe pasobra esey tambe tin di haber cu e liderazgo cu nos tin di nos hendenan muher no solamente na cas, pero tambe n a oficina, pero trahando den e contexto literario p’asina conserva parti di nos herencia, cultura y locual cu ta bon pa nos generacionnan nobo”, Clifford Rosa a conclui.