ORANJESTAD (AAN) – Dialuna mainta, despues cu Presidente di Staten mr. Juan Ady Thijsen, a reuni cu Gobernador, el a duna su declaracion na prensa,
y a splica cu den su funcion como Presidente di Staten, a wordo invita pa Gabinete di Gobernador pa duna su contribucion, den e parti unda e proceso pa formacion di un Gabinete ta cuminza.
“Gobernador ta haya hopi importante pa sa e opinion di Presidente di Staten, con e ta wak e situacion, kico e ta pensa y kico e ta kere cu ta importante tambe, den e cuadro di democracia di e pais. Kiermen, nos so sa unda nos ta para economico, financiero y socialmente, a base di con nos ta para tambe como un estado di derecho, ta hopi importante. Kiermen, e formacion di un gobierno nobo ta hopi importante pa e cuater añanan cu ta bin, y pesey Gobernador ta yama cierto personanan cu tin un funcion importante”, mr. Thijsen a señala.
Presidente di Parlamento a menciona cu nan no por bay den contenido, pero cu loke nan ta trece dilanti ta hopi importante, pasobra esey ta cosnan cu nan ta conoce y nan ta forma nan pensamentonan hunto, pa wak si enberdad mester di un informado, of bay pa un formado di biaha ya cu tur esey ta posible, depende di e situacion.
“Nan ta sondea tambe e pensamento di cada persona cu nan ta yama, den funcionnan importante, pa wak cual ta e puntonan cu nan ta haya importante pa tene cuenta, pa ora nan papia cu tur e actornan participle, den e parti di formacion di e Gabinete nobo”, mr. Thijsen a bisa.
El a reitera e resultadonan di eleccion y e asientonan cu e votacion a genera, cu ta 9 asiento pa MEP, 7 AVP, 2 MAS, 2 RAIZ y 1 Accion 21, y nan hunto tin cu bay wak con ta forma un gabinete nobo.
Pero como Presidente di Staten el a duna su pensamentonan, specialmente riba Estado di Derecho, cu ta hopi importante, mescos cu Aruba su relacion cu Hulanda, cu tin un rol hopi importante no solamente pa Aruba pero tambe pa Corsow y pa Sint Maarten tambe. Esaki ta e puntonan principal cu Presidente di Staten a papia cu Gobernador.
