Pa Ley continuacion di un color politico no ta central pero continuidad ta e base - *Gobierno nobo mester sigui atende entre otro Acuerdonan cu Hulanda, Quanten y Eagle - *E maneho di e proximo gobernacion mester por sostene e recuperacion cu a cuminsa
ORANJESTAD (AAN) — E resultado directo di eleccion 2021, ta bati na porta. E proceso di formacion a haya inicio na momento cu Gobernador a cuminsa cu su consulta na prome luga cu e organonan mas halto di Estado.
E hecho cu Gobernador ta scucha cierto instancianan, ta hiba nos na e realidad di gobernacion di nos pais, den cual Gobernador ta representa e parti no politico di Gobierno como representante di Rey.
Sinembargo den su trabou, e ta haya conseho di Raad van Advies pa asina tur decision ta cuadra te den detayes cu nos Orden di Ley. E ta scucha tambe Presidente di Parlamento loke ta trece dilanti na publico e luga central di representacion directo di Pueblo.
Gobernador lo papia cu tur partido politico cu a haya asiento den Parlamento pa scucha nan opinion riba e gobierno nobo.
Conseho Sociaal Economico. Algemene Rekenkamer Aruba y e organo di supervision Hulandes CAFT tambe o wordo scucha.
Despues cu Pueblo a papia, e constelacion nobo di Parlamento ta conoci. Awor for di Parlamento lo mester nase e Conseho di Ministro cu mester ehecuta trabou diario di e pais.
E proximo Conseho di Ministro lo mester ta di acuerdo cu loke e partidonan a pone den nan programa durante eleccion pa nan por a ofrece nan servicio na Pueblo.
Tin varios diferencia entre loke eleccion ta haci kere di varios aspecto di e sistema politico nacional y e funcionamento di e pais.
Den e proceso di eleccion, hopi acento ta wordo poni riba e figuranan cu lo bay sinta. Pues di papia di e continuacion di un partido.
E pregunta no ta si un partido politico por percura pa tin un gobierno, pero si e personanan cu ta encarga cu continuacion di gobernacion ta capaz pa continua cu loke e gobernacion cu a baha, a laga atras.
Continuidad, cu ta diferente na continuacion, ta e palabra cu ta dicidi kico e gobierno nobo lo acepta na prome luga como su tarea.
Continuidad ta encera entre otro cu e gobernacion nobo den Conseho di Ministro pero tambe den Parlamento, ta cumpli cu acuerdonan cu e Gobierno cu a baha a firma.
Pues e Gobierno nobo mester atende cu Hulanda a base di e Acuerdo cu a firma y si e gobierno nobo no tin capacidad of deseo pa haci esaki, Hulanda ta hala atras.
E Gobierno nobo mester termina e acuerdonan basico cu Gobierno Wever-Croes a logra cu Quanten y Eagle LNG y mester dicidi si ta sigui traha riba resultadonan di esaki manera awa mas barata.
Pa loke ta trata Gobierno Hulandes, e proximo gobernacion tambe mester sigui traha a base di e pakete cu mester sigura cu Aruba no ta cay den e poz for di cual Gobierno Wever-Croes y Hulanda a saca Aruba. Mester yega por ehempel na un acuerdo final pa AZV.
Continuidad no ta nifica cu ta bay sigui ciegamente loke e Gobierno cu a baha ta haci. E ta nifica cu ta atende cu e asuntonan. Si kier trece cambio, no por trece cambio cu ta perhudica Aruba.
Nos por mira con e prome tarea di gobierno Wever-Croes tabata pa tuma medida na momento cu el a hereda e maneho di Gobierno Mike Eman, cu realmente mester a tuma medida pero no a haci esaki y a laga e continuidad aki na Wever-Croes.
Tabata Gobierno Wever-Croes cu mester a dicidi con ta haci posibel pa Aruba paga e proyectonan di PPS, cu gobierno Mike Eman a laga atras. Gobierno Wever-Croes no por a destrui e contractonan.
Den caso di Citgo ta mira con e acuerdo cu Gobierno Mike Eman a firma cu Nicolaas Maduro, a stroba Aruba y Gobierno Wever-Croes no por a cambia e desenlace final di Citgo.
Gobierno Wever-Croes na varios ocasion mester a honra acuerdonan salarial di Gobierno Eman.
Un Gobierno nobo mester wordo forma pa Aruba. E proceso a cuminsa. E proceso di entrega di gobernacion na un coalicion nobo di acuerdo cu Ley.
