Indice di Prijs di Consumo pa luna di Mei 2021 - ORANJESTAD (AAN): Oficina Central di Estadistica a descubri, cu e bestaansminimum pa luna di Mei 2021, a cay un tiki, compara cu e mesun periodo di 2020.
Pa un famia di 2 adulto y 2 mucha, e bestaansminimum awor ta na 4.752 Florin. Pa un famia di 1 adulto, e ta 2.263 Florin.
E CPI pa luna di Mei 2021 ta 97.39, loke ta representa un caida di 0.2% compara cu e indice di April 2021 (97.57) y acumulando un subida di 0.3% te cu na Mei di e aña aki.
E cambio di e CPI pa e ultimo 12 lunanan (Mei 2020 te cu Mei 2021) ta -0.2%, un subida di 1.4 punto di porcentahe (ppt) compara cu e periodo corespondiente di aña pasa (-1.6%).
E promedio anual di e tasa di inflacion pa e periodo di Mei 2020 te cu Mei 2021 ta -2.2%, un caida di 4.8 ppt compara cu e 2.6% registra den e periodo di Mei 2019 te cu Mei 2020.
Durante e luna aki, seis (6) di e diesdos (12) sectornan a registra caida di prijs. E caidanan cu tabata tin e mayor efecto riba e CPI a worde registra pa e sectornan di “Mobilario” (-3.1%) y “Comunicacion” (-0.5%), causando un efecto di -0.28 y -0.04 ppt. E caidanan den e restante sectornan a contribui cu un efecto di -0.05 ppt riba e CPI di Mei 2021.
E caidanan aki a worde contraresta parcialmente door di subida den e indice di e sectornan di “Recreaccion y cultura” (1.2%) y “Paña y sapato” (1.4) cu a contribui cu un efecto di respectivamente 0.11 y 0.03 ppt riba e CPI di Mei 2021. E subidanan den e restante sectornan a contribui cu un efecto di 0.05 ppt riba e CPI di Mei 2021.
E caida den e sector di “Mobilario” a worde causa door di principalmente un caida di 8.2% den e categoria “Aparato pa uso domestico”, causando un efecto di -0.20 ppt. E caida den e sector di “Comunicacion” a worde causa door di un caida di 10.1% den e categoria “Equipo di telefon y fax”, causando un efecto di -0.04 ppt.
E subida den e sector di “Recreaccion y cultura” a worde causa door di principalmente un subida di 3.6% den e categoria “Vacacion”, causando un efecto di 0.10 ppt. E subida den e sector di “Paña y sapato” a worde causa door di principalmente un subida di 1.5% den e categoria “Paña”, causando un efecto di 0.03 ppt.
Canasta di consumo: E canasta di consumo di e CPI ta consisti di 408 bienes y servicionan. Compara cu April 2021, 39.5% di e bienes y servicionan aki a conoce un aumento di prijs causando un efecto di 0.60 ppt, mientras cu 42.9% ta mustra un caida di prijs, cu a contribui cu un efecto di -0.78 ppt y pa e restante 17.6% no tabata tin cambio den prijs.
Prijsnan di bienes a baha cu 0.4% y a causa un efecto di -0.25 ppt. Prijsnan di servicionan a conoce un subida di 0.2% y a causa un efecto di 0.07 ppt riba CPI di Mei 2021.
Core inflation: E asina yama CPIC (core inflation) - CPI excluyendo e efecto di energia y cuminda - a registra na Mei 2021 un caida di 1.7%. E indice di energia - cu ta consisti di e productonan: electricidad, awa, gasolin y diesel a registra un caida di -4.1%. E indice di cuminda a registra un caida di 2.6%.
Bestaansminimum: E bestaansminimum pa un hogar consistiendo di 2 adulto y dos mucha (edad 0-15 aña) na Mei 2021 ta 4.752 Florin.
DIARIO a compronde cu esey ta un caida di 42 Florin compara cu Mei 2020 (Afl. 4.794).
Tambe ta bon pa menciona cu e bestaansminimum pa un hogar di 1 adulto ta 2.263 Florin, esey ta un caida di 20 Florin compara cu Mei 2020 (Afl. 2.283).
