Aruba ta bay cu varios punto di agenda:
ORANJESTAD (AAN) – Cuminzando e siman aki, esta Dialuna 23 di October, Presidente di Parlamento a biaha pa Sint Maarten pa participa den e reunionnan Tripartiet.
Durante e Tripartiet lo trata diferente tema, entre nan e terminacion pa locual ta 'geschillenregeling'.
“Nos di parti di Aruba cu ta e trekker, na e momento aki a haya e draft ultimo di DWJZ y esey nos lo present’e y decisionnan lo wordo tuma. Y, seguramente tumando e decisionnan cu ta al caso, cu a toca e tres islanan ultimo tempo, nos a hink’e den e capa di ‘Democratic Deficit’ y esey lo wordo atendi, principalmente, manera con pa atende cu Aruba, Curacao y Sint Maarten, na momento cu a pidi un ayudo conforme cu articulo 36 y seguramente, riba e parti ey nos lo debati, y sigur yega hunto tambe, pasobra na momento aki, ora bo wak e strategia cu Hulanda ta den division den reino: ‘Sint Maarten, si bo ta comporta bon bo ta haya 3%, Curacao, bo tin chens di drecha bo onvoldoende, of bo a haci onvoldoende mi ta dunabo 5, pero si bo haci voldoende tambe lo bira 3, y Aruba, abo cu ta bon bezig, bo economia ta bon, CAft ta duna bo tur cos, puntonan positivo, bo GDP a baha, abo ta haya un straf di 6.9 pasobra Parlamento Hulandes no gusta bo’. Esey a pasa y esey nos ta bay combersa riba dje, y mi ta kere cu awo mas cu nunca nos mester ta uni, y sigur mas cu nunca nos mester yega na otro, pa nos por pidi kico ta articulo 36; kico ta e esencia di e articulo aki”, Edgard Vrolijk a señala.
El a sigui bisa cu Aruba a pidi ayudo, e ayudo ta un fianza, Parlamento a bisa si, cu nan ta paga bek, pero ban palabra tambe si un straf rente ta cay den ayudo.
“Mi a wak e palabra strafe ta cay den articulo 36, riba un aspecto huridico. Mi ta kere cu esaki ta e punto di mas importante pa locual ta e agenda. Banda di esey nos tin tambe e conexion entre e Islanan, y mi a compronde cu hasta ta bay tin presentacion di e director di Airport di Aruba, y cu e ta hiba e plannan pa reino y vooral pa e conexion entre e tres islanan pa locual ta e conexion aereo cu ta scars. Esey pa mi ta e puntonan mas importante, y sigur nan a cay den bon ora tambe”, Presidente di Parlamento Edgard Vrolijk a indica.
El a expresa tambe cu nada ta pa casualidad. Tin biaha tin cosnan cu ta pone bo un caminda y sigur e meta ta pa uni, mescos cu a uni cu locual tabata e caso di COHO y esey a bay for di mesa.
“Den e caso aki tambe nos mester uni, pasobra na final di dia pasobra locual ta pasando a crea un debe pa Sint Maarten, un debe pa Curacao, y si Aruba cu no a crea un debe cu mester paga bek, ta esun cu a haya straf mas pisa pa haci lo corecto”, Edgard Vrolijk a subraya.
