ORANJESTAD (AAN): Recientemente, Minister di Enseñansa y Deporte Endy Croes a reuni cu Señora Anne Marie Proveyer directora di Departamento di Enseñansa Aruba (DEA) y Señora Gina Ras-de Kort, kende ta coordinado di Seccion di Guia di DEA.
Durante e reunion a dialoga riba diferente punto di interes di enseñansa. A dialoga tocante “Vierlandenoverleg” cu lo tuma luga e aña aki den e luna di november na Hulanda. Durante e luna di september, e represesentantenan di Hulanda hunto cu Departamento di Enseñansa di Aruba, Curaçao y Sint Maarten a reuni pa riba nivel di ambtenaar prepara e puntonan di agenda pa e reunion cu lo tuma luga entre e cuater Ministernan di Enseñansa di Reino Hulandes na november.
Ademas di esaki, a dialoga riba e maneho integral di idioma nobo. Manera ta conoci, dia 31 di maart 2023 Tijdelijke Werkorganizatie (TWO) a aproba e maneho di idioma nobo. Durante e reunion a profundisa riba e implementacion di e parti integral di maneho di idioma, cual ta alfabetisacion. Pues, a trata tur locual mester prepara pa implementa esaki aña escolar 2024-2025 den e prome aña di scol basico na Aruba.
Den transcurso di october cu ta reuni cu tur schoolbestuur, lo duna un splicacion amplio di e proceso y prepara e maestronan. Ta trahando duro riba tur aspecto pa implementacion di alfabetisacion di Papiamento pa aña 2024. Un bon reunion na bienestar di enseñansa en general.
