E ta mira cu tin mehoracion den diferente area di Gobieno:
ORANJESTAD (AAN) – Señor Gavril Mansur, Presidente di Camara di Comercio y Industria di Aruba (KvK) ta mira cu tin mehoracion den diferente area di Gobierno, por ehemplo Minister Geoffrey Wever ta haciendo su miho esfuerzo pa corta den e “red tape”, cu ta cay bao di dje.
Mansur a comenta cu e sa cu ainda tin departamentonan cu mester mas trabao, por ehemplo DIP cu ta medio paraliza, y cu tin di haber cu e razzia/entrada hudicial cu tabata tin di husticia, y e sa cu gobierno ta trahando riba esey.
Mansur no tin detaye pasobra gobierno no ta dunando mucho detaye, y keto bay tin cierto red tape (burocracia) cu mester mehora ainda, segun Presidente di KvK.
“E asunto di red tape ta un di e criticanan mas fuerte cu KvK ta haya di su miembronan, comercio y inversionistanan cu tin interes pa bin Aruba. Si bo haci algo mucho dificil pa hendenan, nan no ta bin. Un tiki red-tape bo mester pasobra bo mester tin control riba cosnan, pero Aruba tin biaha tin e tendencia di bay mucho leu riba red-tape”, Gavril Mansur a indica.
El a agrega cu e ta contento cu tin iniciativanan pa corta den e burocracia, pero mas mester worde haci. “Si nos kier atrae inversionista, demostra esey. No djis bisa esey, pues tin mas trabao pa haci y nos lo yuda te unda cu nos por pa facilita e proceso”, el a bisa.
