ORANJESTAD (AAN): Minister di Enseñansa y Deporte Endy Croes a reuni cu sindicato SEPPA tanto Presidente Magaly Brito y tambe Secretaris Karina Geerman riba varios punto.
Manera Minister Endy Croes semper ta bisa cu ta percura pa pone echonan tras di e palabra pa cumpli tambe cu e trabounan pendiente na bienestar di e empleado y p’esey regularmente ta scucha e sindicatonan pa por sigui traha riba preocupacionnan cu tin.
Por corda manera Minister Endy Croes a bira minister el a cuminsa atende varios problematica entre otro esun di “zweminstructeurs”, kendenan tabata tin 20 aña ta traha sin un contract of sin algo fiho.
Na augustus 2022 a logra firma cu tur “zweminstructeur” un contracto di 5 aña cual ta brinda Alivio, unda nan tambe por haci, por ehempel un prestamo pa cumpra un auto of pa inverti den nan hogar.
Asina a sigui traha pa resolve varios inkietud y den e proceso aki ta reuni cu diferente sindicato pa scucha nan y mantene nan informa di e trabounan cu ta andando.
Reunion cu SEPPA den bon atmosfera:
Durante e ultimo reunion recien, a trata varios punto. A recapitula e solucion di KM vergoeding pa e empleadonan di MDC, unda a regla esaki pa alrededor di 10 empleado. Esaki antes no tabata corecto y a cana e caminda corecto a traves di Departamento di Recurso Humano (DRH) ilustrando e importancia pa trek esaki recht y corigi esaki.
E conseho positivo aki a pasa Ministerraad, unda e grupo aki awe sigur ta contento cu despues di varios aña a regla esaki. Asina a toca tambe tema di tres (3) empleado cu pa varios aña tin un problema cu e manera cu nan ta wordo paga despues di a haya un “overplaatsing”. A splica SEPPA cu manera a priminti cu a traha riba e documentonan aki y den luna di september finalmente esakinan lo keda cla y asina por kita e inkietud aki tambe for di mesa.
Riba otro puntonan, manera klassenassistent tambe DPS ta trahando riba esaki unda finalmente den luna di october tin varios MB ta kedando cla pa asina alivia e trabounan cu tin varios aña atrasa.
Minister Endy Croes a splica cu hopi biaha mester warda riba conseho di departamento y esaki sa tuma tempo, pero nan Bureau ta percura pa keda follow up y asina logra cumpli y resolve e casonan cu tin basta aña pega.
Finalmente, SEPPA a keda contento cu tur e informacionnan ricibi y tambe por a nota cu en realidad ta trahando riba diferente caso y un pa un nan ta kedando cla. Ta priminti y ta cumpli!
