Un insurance pa cumpra online pero cobra pa compra local:
ORANJESTAD (AAN) – Frans Ponson, Presidente di Comerciantenan Uni Aruba (CUA), den un entrevista cu DIARIO a declara cu a bira un sorpresa pa comerciantenan, despues di a mira cuanto nan ta paga na banco, y e ta mira esaki como un BBO nobo pa pueblo.
Ponson a bisa cu tin un conmocion cu esaki, pero e realidad ta cu ora CUA a informa tur e comerciantenan local pa bay wak nan statement y ripara cuanto nan ta pagando riba nan debit card, esaki ta deudelijk awe, pasobra nan a haya yamada di comercio, pueblo y riba facebook, constantemente, ora pueblo a haya sa cuanto gasto extra a bin riba e debit card.
“Mi ta invita pueblo pa mira riba e facebook di CUA cu nos a post dos video di visa y master card unda ta papia di e tema aki, cu awor t’asina leu cu nan ta gara mas cu 50 pa 60%, cu nan ta paga instancianan grandi internacional pa no competi cu nan y nan tin 80% di mercado riba mundo”, Frans Ponson a señala.
Ponson a bisa cu no ta papiando di credit card, pero t’asina si, cu gobierno di Merca y internacional ta defende pueblo via ley, di e debit card. “E placa cash cu bo tin na banco. Mi ta lamenta masha hopi cu den pleno campaña wak tur e ministernan pero ni un di nan mi a mira toca e topico aki”, Ponson a señala.
El a remarca cu Banco Central a duplica e tema aki, pero ni asina mes ningun hende ta touch cu ne. “E debit card aki antes tabata un debit card, y aworaki banconan a haci’e un debit visa of un debit master card. Y e unico contexto cu nos a haya ta ‘nos ta cobrando boso e 2% ey, corda bon ta 2% pa pueblo e ta bin, pasobra e ta un insurance pa ora bo cumpra online”, segun Frans Ponson.
E ta puntra ki compra online? Pasobra nos ta pueblo di Aruba, nos ta cumprando den e Pais Aruba, nos no ta cumprando online na Aruba. “Awo, si e banconan aki t’asina amabel pa e persona cu su debit card por cumpra internacional, pabien! Contento; un bon servicio, si nan ta cobra e 2% pa nos traha internacional cu ne, nos ta contento, nos ta paga e insurance ey. Pero na aruba, nos no ta cumprando online; nos ta bay den pueblo, den supermercado y nos tin cu paga e 2% ey”, Ponson a remarca, y a informa cu for di 1 di Januari e ta bay bira peor.
