Despues di a gasta miyones di e pagado di belasting
ORANJESTAD (AAN): Otmar Oduber, for di cas di su mayornan, a papia bon cla riba e situacion di caso Flamingo y a desbarata e conclusionnan cu Ministerio Publico a presenta dialuna, mientras cu diabierna awo su defensa lo hiba palabra den corte.
Finalmente despues di 5 aña por a scucha voznan di Ministerio Publico, pero pa ta un vocero di Ministerio Publico, e persona aki a sona bastante confundi y bruha, pegando hopi den su declaracion. Esaki ta algo cu ta pasa ora ta pone cosnan padilanti cu no ta cuadra cu e realidad.
Oduber ta indica cu ta bisto e influencia cu Ministerio Publico kier tin riba e sistema democratico di nos isla. Algun siman atras tabatin un ‘misinformation’ riba e dia cu e caso lo a tuma luga, unda a wordo avisa cu esaki lo tabata dia 6 di december, dia di eleccion, siendo cu esaki no ta e caso, ya cu for di algun luna a stipula cu e caso lo a cuminsa 18 di november. E caso ta ya caba den su fase final, diabierna defensa lo hiba palabra, dialuna proximo lo tin e discusion entre hues y e dos partidonan y despues di esaki lo mester warda pa un veredicto.
Otmar Oduber ta keda respeta y kere den nos sistema hudicial, e imparcialidad cu tin pa loke ta nos huesnan, pero lamentablemente pa loke ta trata Ministerio Publico e no por papia mescos.
Ministerio Publico a dura 5 aña y 3 luna, cu e caso aki. Nan a gasta entre 8 pa 10 miyon Florin den e caso aki y finalmente ora a presenta den corte e supuesto pruebanan, no ta nada riba lo cual nan a cuminsa e caso cune mas cu 5 aña pasa.
Hasta por a wak vocero di Ministerio Publico ‘downplay’ e hecho di e BCInan cu tabatin acusacionnan contra Otmar Oduber di entre otro labamento di placa, bendemento di tereno comercial, organisacion criminal cu e lo tabata forma parti di dje y enrikecemento ilicito.
“Ayera pueblo di Aruba por a wak cu Otmar a papia e berdad! Nada di esaki ta den e acusacionnan mas. Nada! Y awo a para bira cu si Otmar conoce un hende, of si un hende a vota pa partido POR den pasado, posiblemente pa partido PPA awo y por ta ainda nan por bin bek riba mi ora mi tabata den partido AVP, esey ta motibo pa bo persegui un politico”.
Si sigui e mensahe aki di Ministerio Publico, ta uno cu for di aña 1986 te awe, mester pasa piki tur minister, sera tur hende pasobra tur politico conoce un hende na Aruba , tur politico a papia cu un hende y a scuche y a bise cu ta bay wak con por yude. Esey ta algo normal den tur campaña y e ta sosodiendo awo tambe.
“ M'a hacie antes y mi ta haciend’e atrobe, pasobra esey ta trabou di un politico. Politico tey pa presenta su plan, su vision, y e tey pa trece solucion, alivia y yuda su comunidad”. Topa un hende y bise c u ta bay yude, cu ta bay follow-up p’e, no tin nada robes si no ta bay en contra di e reglanan y leynan existente pa por beneficia e persona.
