President di IOC Thomas Bach lo bay bishita actividad di Aruba Doet tambe  

ORANJESTAD (AAN): Manera DIARIO a trece dilanti caba, Comite Olympico Arubano ta preparando pa Diabierna awor nan ricibi bishita di president di International Olympic Committee (IOC), esta Thomas Bach.

   E ta yega Aruba riba Diabierna 10 di Maart 2023, e lo ta na e isla pa un bishita oficial cu lo dura dos dia.  Ademas di bishita di cortesia na Gobernador y na Ministronan, e lo ta encarga pa inaugura oficialmente e edificio nobo di Comite Olimpico Arubano den Vondellaan.

   Pa Comite Olimpico Arubano, e bishita aki di Thomas Bach ta uno hopi importante, pasobra e Comite local por bay mustr’e, kico ta haciendo cu e fondonan cu ta ricibi no solamente di Panam Sports, pero tambe di Olympic Solidarity.

   Bach lo bay tin un bishita di dos dia hopi extenso.  E lo ta yegando Diabierna atardi, y lo bay ta haciendo bishita na Gobernador Boekhoudt, Ministro di Deporte, y tambe Prome Ministro.  Despues lo bay tin un ‘Business Connect’ unda President Bach lo por topa comunidad comercial y e lo duna un discurso cu por inspira comercio di con deporte ta asina importante na Aruba, y di con mester inverti tambe den atletanan.

   Diasabra dia 11 di Maart 2023, Comite Olimpico Arubano lo bay inaugura nan oficina completamente nobo, cu e renchinan, y tur loke ta trata loke e oficina nobo ta bay ofrece no djis pa e comision, sino pa e federacionnan y atletanan y Aruba en general.

   Diasabra merdia lo bishita un proyecto di Deporte, unda Aruba Doet lo ta activo e momento ey.  Ta bay demostra con importante boluntarionan ta pa deporte y den e caso aki, pa drecha un proyecto deportivo.