President di FDLA ta bishita Aruba Fashion Week buscando talento local

ORANJESTAD (AAN): E Federacion di Diseñadornan Latinoamericano (FDLA), bao di e liderazgo visionario di Albania Rosario,

ta anuncia orguyosamente un logro importante pa moda multicultural: FDLA, hunto cu su director, lo ta e entidad patrocinado oficial pa duna un diseñador di Aruba e oportunidad pa presenta su coleccion den e proximo edicion di New York Fashion Week, durante e shownan prestigioso di FDLA na februari 2026.

E patrocinio aki ta representa un paso fundamental pa FDLA y Albania Rosario, reafirmando nan compromiso di stimula intercambio multicultural di talento y inspira generacionnan nobo di diseñadornan pa sigui desaroya y yega riba podionan internacional. FDLA, funda y dirigi pa Albania Rosario, ta un organizacion multicultural dedica na duna exposicion y oportunidad na diseñadornan estableci y emergente di Latinoamerica y di mundo, resaltando tecnicanan artesanal y conectando talento latinoamericano cu mercado Mericano y global.

Pa mas di 15 aña, Albania Rosario a dirigi e mision di FDLA pa apoya, promove y eleva diseñadornan cu, pa falta di recurso, no a haya acceso na plataforma internacional. Danki na su trabou incansabel, FDLA a converti den e plataforma di moda Latino mas importante na New York, ofreciendo desfilenan durante NYFW, programa di mentor, oportunidad pa networking y acceso na prensa internacional.

Aruba Fashion Week (AFW), funda pa Angel León na 2016, a establece su mes como e evento di moda mas importante di isla, cu mision di internacionalisa talento creativo local. AFW no solamente a sirbi como plataforma pa modelonan Arubiano manera Anouk Eman y Guizza Maria Steenvoorde, pero tambe a habri porta pa talento Arubiano por desaroya na nivel internacional.

Segun su fundador, Angel León: “For di inicio, compromiso di AFW ta pa crea plataforma real y sostenibel pa talento Arubiano por crece internacionalmente. Mira nos modelonan na New York y apoya marcanan local ta un orguyo; awor duna un diseñador local e plataforma aki pa mustra cu Aruba tin creatividad y calidad pa competi den moda global.”

E patrocinio pa un diseñador di Aruba ta marca no solamente un capitulo nobo den colaboracion entre Aruba Fashion Week (AFW) y FDLA, pero tambe ta amplia mision di FDLA di inspira y empodera talento emergente. E iniciativa aki ke motiva diseñadornan, modelonan y creativonan pa persigui nan soño y pa contribui na un industria di moda mas diverso, inclusivo y global.

FDLA ta invita comunidad di moda pa celebra e logro aki, cu ta simbolisa union di cultura y poder transformador di apoyo mutuo. Pa mas informacion tocante FDLA y nan proyecto, bishita https://www.fdla.co.