Presentacion extenso di DIMP na federacionnan di deporte

Concientisando e comunidad deportivo riba e leynan di impuesto

ORANJESTAD (AAN): Durante e curso di e “Capacity Building Training” diamars ultimo, despues di e prome presentacion unda a elabora riba e rol di Camara di Comercio, a sigui cu e siguiente parti, unda a haya un tremendo presentacion di un ekipo di damas di Departamento di Impuesto (DIMP).

   E grupo cu a consisti di Lisandra Laclé, Johrainne Lacle-Giron y Sra. mr. Angeline Geerman-Giel, a splica varios aspecto di gran importancia pa cu maneho deportivo na nivel financiero, ademas di contesta un gran cantidad di pregunta.

   E sesion aki a bira esun mas interactivo di e curso, ilustrando con importante e conocimento financiero ta pa e mundo di deporte. Den e grupo dinamico aki cu a presenta, a conta cu Lisandra cu ta lidera e seccion di BBO, Johrainne cu a forma parti di e proyecto grandi digital di Bo Impuesto y Angeline cu ta hefe interino di DIMP.

   Un gran parti di e presentacion a repasa e leynan di impuesto, particularmente e parti di pago di BBO/BAVP Y BAZV. Esaki a trece cune hopi informacion valioso pa e federacionnan, mirando cu ta e base di e impuesto cu un asociacion y pues tambe federacionnan, mester paga impuesto. Claramente esaki a bira un topico sumamente interesante cu hopi intercambio entre e dirigentenan deportivo y e expertonan di DIMP, considerando e importancia di cumpli cu tur ley di impuesto.

   E otro tema cu a gara hopi atencion ta con ta distingui e diferente fondonan di entrada cu un federacion por tin, y na ki momento lo mester paga impuesto riba esaki. Locual e expertonan di DIMP a splica, cu a base leynan di impuesto, mester distingui hopi bon e diferencia entre entrada cu ta considera como ganashi, entrada como patrocinio (sponsorship) y entrada como donacion. Aki a duna varios ehempel di cada tipo di entrada, y na cua momento mester paga impuesto of no. Adicionalmente a papia tocante e leynan cu ta regula e primanan cu mester paga, p.e. si ta paga un entrenador nacional of internacional un salario of “vergoeding.

   Pa finalisa e anochi, a splica e avancenan tecnologico, entre otro e portal di DIMP cu jama “BO Impuesto” cu awor ta duna e facilidad di paga tur impuestonan online. Despues di un ronda di pregunta a finalisa e anochi dunando danki na e grupo di orador invita y manera tur otro orador anterior, a entrega un obsekio y a yama nan bon bini den e famia di Comite Olimpico Arubano.