Presentacion di Arubahuis pa studiantenan di “Minor Koninkrijkszaken”

ORANJESTAD (AAN): Directora interino di Arubahuis drs. Glenda Hernandez y hurista di Arubahuis mr. Shandra John

a duna un presentacion na e grupo di les “Minor Koninkrijkszaken” na Haagse Hogeschool.

   E presentacion a cuminsa cu un introduccion di Shandra John di Aruba unda a papia entre otro riba con grandi e isla ta, clima, populacion, idioma, GDP, sistema di gobernacion y sistema hudicial. Tambe a duna un splicacion di e posicion di Aruba den Reino, cu a cuminsa cu un propio representacion na 1983.

   Na aña 1986 Aruba a haya su Status Aparte y asina e representacion a bira oficial Gabinete di Minister Plenipotenciario di Aruba, cu den boca di pueblo ta worde yama Arubahuis. E fecha di 10 di October 2010 e pais Antia Hulandes a keda desvolvi, unda e islanan Curaçao y St. Maarten a bira pais autonomo den Reino y e islanan Bonaire, St. Eustatius y Saba a haya e status di “openbaar lichaam”.

   Glenda Hernandez den su presentacion a concentra riba e vision , mission y esencia di e balornan di Arubahuis. Arubahuis ta un instituto respeta cu ta duna servicio na un manera integro, visibel, profesional, eficiente na Gobierno di Aruba y e comunidad Arubiano na Hulanda. Arubahuis ta traha na estrecha e lasonan entre Aruba, Hulanda y e otro paisnan den Reino. Como mision Arubahuis ta boga pa stabilidad, solidaridad, cooperacion y integridad. E esencia di Arubahuis ta actua na un manera profesional y integro; anda cu respet pa otro y actua responsabel.

   Segun señora Hernandez a stipula cuater punto di interes unda Arubahuis mester yega. E prome ta cu Arubahuis a drecha su imagen na uno mas visible, respeta y independiente. Di dos punto ta cu Arubahuis a realisa un otro tipo di brinda servicio/resultado door di un cambio den nesesidad y trends. Un otro punto cu a bin padilanti ta cu Arubahuis ta haci mas uso di su capacidad pa atrae mas inversionista Aruba y haci tambe mas bon uso di subsidionan existente na beneficio di Aruba. Por ultimo lo trece mas coherencia entre e team di Arubahuis y tambe mas respet pa opinion di otro.

   Despues señora John a repasa e lista di e departamentonan den Arubahuis y kico nan funcion ta den e organizacion. Como parti final di e presentacion a tene un quiz bou di e grupo di studiante pa test nan conocimento di Aruba. Diparti di “Minor Koninkrijkszaken” e docente presente Olivier Oele a gradici Glenda Hernandez y Shandra John pa nan presentacion na e studiantenan.

   E potretnan ta cortesia di Arubahuis.