ORANJESTAD (AAN): Ora cu bo no sa ki number pa cumpra pa cualkier sorteo, bo ta djis pidi un ticket cu number loco.
E machine mes ta genera numbernan usando su ‘random number generator’, y imprimi numbernan pa bo.
Esey ta loke Rona a haci recien, ora el a cumpra ticket pa e sorteo di Lotto di Dia.
El a keda feliz ora el a nota cu e numbernan di dje a sali anochi, pues el a bay cu e jackpot!
Diaranson el a acudi na Oficina di Lotto na Playa pa reclama su premio. Despues cu nan a revisa su ticket y check e numbernan di banco, a scan e barcode. E computer mesora a indica cu Rona a gana e 54.000 Florin cu ta e jackpot di Lotto di Dia.
Asina a sigui cu e proceso pa transferi e premio electronicamente pa su cuenta di banco. Rona a indica cu e ticket ganador el a cumpra na Lucky 77.
