ORANJESTAD (AAN): AIB BANK N.V. ta contento di por anuncia cu a logra conclui exitosamente un transaccion pa cu financiamento di e prestigioso propiedad Hilton Aruba Caribbean Resort & Casino.
E financiamento aki a wordo realisa conhuntamente cu ocho institucion financiero den e region di Caribe Hulandes pa un suma total di USD 171,4 miyon y a wordo lidera pa AIB BANK N.V.
E transaccion ta consisti di cambionan den e financiamento existente y inclui fondonan
adicional cu lo wordo uza pa construccion di un toren adicional cu ta consisti di 161 camber
y tambe renobacion di diferente camber y areanan existente.
Actualmente e propiedad tin tres toren di camber cu ta consisti di un total di 357 camber.
Ora cu e construccion finalisa, cu ta wordo premira na aña 2025, e Hotel lo consisti di
cuatro toren cu un total di 518 camber. E proyecto aki sigur lo contribui na nos industria
hotelero y na e economia Arubano en general.
AIB BANK N.V. sigur ta gradici Hilton Aruba Caribbean Resort & Casino pa e confianza di a
wordo selecta pa di dos biaha den e rol di Mandated Lead Arranger, financiador y Agente.
Tambe AIB BANK N.V. ta gradici y felicita tur e financiadornan cu a participa den e
proyecto aki. AIB BANK N.V. tambe ta agradecido na tur esnan cu a asisti y aporta den e
proceso aki.
Sin duda tur partido envolvi ta orguyoso di por contribui na e futuro di e hotel iconico aki na
Aruba.
