ORANJESTAD (AAN): E asina yama proyecto di “Where Culture Lives”, ta bay lanza nan encuesta cu lo ser haci tanto na Aruba,
Curaçao, Bonaire, Saba, St. Eustatius y St. Maarten, cu ta bira asina e fase crucial pa compronde con comunidad ta crea y experiencia bida cultural den henter Caribe Hulandes.
Despues di exitoso gruponan di discusion cu profesionalnan local y personanan clave, e team di investigacion awor ta invita publico en general pa participa den un encuesta breve pero significante.
Bao di e titulo “Your Voice, Where Culture Lives”, e encuesta ta explora con arte, cultura, y patrimonio ta duna bida na e Islanan di Caribe Hulandes. Door di comparti nan experiencianan, habitantenan por mustra loke cultura nifica pa nan, y ta orienta e politiconan responsabel y institucionnan pa nan apoya mihor nan comunidadnan.
Lo puntra e personanan riba nan participacion den actividadnan cultural, e accesibilidad pa espacionan cultural, y e financiamento. Tambe riba e rol di Gobierno y comunidad pa preserva y promove herencia di patrimonio.
Cada isla lo tin un coordinador cu lo dirigi un team chikito di personanan cu lo sali pa haci e encuesta y lo bay ta na lugarnan publico clave, invitando hendenan pa completa e encuesta y asisti tur hende cu kizas mester di un apoyo of representante.
E encuesta lo ta disponibel den formato digital via un link cu nan lo dunabo sea na Ingles, Papiamento y Papiamentu, y lo durabo como 10 minuut pa keda cla. Nan ta encurasha mayornan pa yena e encuesta pa nan mes, of pa cualkier mucha bao 12 aña di edad.
“Cada cancion, baile, pintura, y tradicion ta mantene cultura di e islanan bibo. Esaki ta un chens unico pa documenta, reflexiona y haci influencia di con bo ta mire, ta apoya, y ta celebra e bida cultural,” ta loke Jorien Wuite a declara. Como coordinadora di e proyecto y directora di e organizacion ‘Lemonade’, e por indica cu e team aki ta contento cu e representantenan di OCW a bishita nan recien pa traha riba mas compromiso, apropiacion y aplicacion di e resultadonan di e proyecto ‘Where Culture Lives’.
Pa participa den e encuesta, bo tin di sigui e link oficial cu e coordinadornan di cada isla ta duna. Pa Aruba esey ta Gregory Richardson. E encuesta ta disponibel di awor te cu e prome siman di December 2025. E fasenan despues di e encuesta lo consisti di un analisis detaya y e recomendacionnan tambe.
