Señor Randall van Trigt di Stichting HUNTO:
ORANJESTAD (AAN): Señor Randall van Trigt di Stichting HUNTO recientemente a declara na DIARIO cu, compara cu mas di 20 aña pasa, termento, conoci awe dia como bullyin, ya tabata algo existente. E diferencia principal cu awendia ta cu mundo a cambia, tecnologia a bira hopi mas accesibel, y esaki a facilita aparicion di e fenomeno conoci como ‘cyberbullying’.
Den pasado, mucha ta worde tenta na scol, pero ora e ta bay cas, cerca su mayornan, e ta haya amor, comprenscion y apoyo, y e bullying ta para ey. Pero awor, den un epoca digital caminda medionan social y WhatsApp ta parti di bida di tur dia, e bullying no ta caba den cura di scol. E ta sigui inclusive ora muchanan ta yega cas, caminda nan ta pensa cu nan ta na un luga sigur, mientras nan ta sigui wordo ‘cyberbullied’.
Segun Van Trigt, e presion social na Aruba ta aumenta, y hasta docentenan mes ta sinti stress. Hopi biaha nan ta actua no solamente como maestro, sino tambe como mama, tata y psicologo. Klasnan grandi y falta di tempo ta complica e situacion, especialmente cu hopi mucha ta bin di famia kibra.
Van Trigt ta enfatisa cu tur esaki tin un gran impacto riba salud mental. Stichting HUNTO ta traha constantemente riba conscientisacion, duna charla na scolnan y organisa eventonan special pa promove importancia di salud mental. Segun e fundacion, e clave ta educa muchanan, docentenan, mayornan y pueblo general.
