Preparando pa exhibicion ‘Visual Voices Photography’ na San Nicolas

ORANJESTAD (AAN): E asina yama ‘Visual Voices Photography’ ta un proyecto di seis siman cu a haya bida na e traimerdia di YMCA of Aruba, miho conoci como Y’s CARE.

   E proyecto aki a cuminsa na 2020 na YMCA San Nicolas, pero lamentablemente debi na e pandemia di Covid-19, esaki mester a worde posponi pa 2 aña. Afortunadamente, e proyecto aki a worde rebiba cu gran entusiasmo den februari 2022 door di e supervisora di Y’s CARE, señora Inki Geerman.

   E biaha aki, e grupo tabata consisti di ocho participante entre un edad di 10 y 12 aña cu tabata tin un gran interes pa descubri mundo den un forma diferente. Na final di e proyecto, binticuater fotografia a worde selecciona pa e exhibicion, unda cu ta demostra con e hobennan aki a explora nan comunidad y captura esaki via e lens di un camara.

   Bao di e direccion di e conocido fotografo Canades, sr. Randy Bullerwell, e participantenan a siña aspectonan tecnico di fotografia y, alavez, a desaroya nan propio perspectiva y estilo creativo. Un danki special ta bay na sr. Tito Bolivar, director di ArtisA Aruba Gallery, cu a permiti nos un espacio pa comparti e exhibicion aki cu publico, celebrando e talento di nos artistanan hoben.

   E exhibicion lo ta habri pa publico for di 9 di april te cu 23 di april. Nos ta invita comunidad pa pasa na ArtisA na San Nicolas pa admira e trabao di e hobennan aki unda cu nan ta comparti nan inspiracion por medio di e imagennan cu nan a captura.