Preparacion pa Aruba Soca Monarch ta den full swing

ORANJESTAD(AAN): Den un entrevista, presidente di Stichting Musica Edwina Werleman a papia riba e preparacionnan tumando lugar,

pa e festival mas grandi di nos isla cu ta e Aruba Soca Monarch contest.

El a splica cu for di siman pasa caba a pone e frame di e stage na Carnival Village.

“Dialuna mainta mi a haya un update cu e trabao ta sigui duro duro eynan, unda cu tur material cu tabata falta tey caba”.

Nos area unda cu e huradonan ta bay sinta tambe ta na su lugar for di siman pasa y awor nos a pone e tentnan tambe pa e bendedornan di cuminda, segun Werleman.

El a sigui bisa cu e trabaonan pariba ta canando hopi bon y cu tur hende ta trahando duro pa e festival mas grandi di nos isla bira un exito grandi.

“Nos ta pronostica cu ta bay tin un ambiente hopi hopi bon den Aruba Carnival Village, pa motibo cu e plan logistico ta un tiki cambia”.

Esaki segun e presidente di Musica kende a bisa cu e escenario a move un tiki di lugar.

El a indica cu den e dianan cu ta bin lo publica algo mas di esaki, pa pueblo cuminza custumbra cu e cambio.

Ta bay tin un area special unda cu personanan por bin cu nan ‘beach chair’ por sinta, cu bon bista pa e stage.

Tin un tribuna tambe pa esnan cu kier sinta descansa y wak e festival.

E pre benta di pay-per-view ta bayendo bon y venta di carchi pa drenta Carnival Village tambe ta bayendo bon.

Werleman a splica cu tin un special unda cu si bo cumpra 10 carchi, bo ta haya un gratis.