Historia di 1985 ta ripiti su mes cuarenta aña despues
*E esencia di Status Aparte ta bira herencia pa gobierno nobo
*Gobernacion Evelyn Wever-Croes ta entrega su exito na sucesor
ORANJESTAD(AAN)—Den futuro Aruba lo sigui goza di e resultadonan di Gobiernonan Evelyn Wever-Croes, cu como uno di su regalonan a haci cu na fin di Januari, 3001 pensionado no mester paga belasting mas.
Un logro di e Gobiernonan Wever-Croes cu ta habri 2025, cu pa loke ta trata mundo politico y di gobernacion, ta entrega Aruba un copia bibo di loke a pasa na 1985.
E Gobierno nobo cu asumi poder despues di Gobierno Evelyn Wever-Croes number 2, lo tin na su disposicion, placa pa atende cu asuntonan di Aruba como herencia di e trabou cu a wordo haci dor di Gobierno Evelyn Wever-Croes.\
Manera for di 2023 DIARIO continuamente a trece dilanti, e anhelo pa por tin gobernacion bou comando, tabata biba cerca hopi politico na Aruba ya cu na 2025 Aruba ta cuminsa prepara pa recorda cu na 2026 ta bira cuarenta aña cu Betico Croes a bira e politico cu a cumpli cu su promesa y a entrega Aruba su Status Aparte, cu e mes lo no por a mira bira realidad lamentablemente.
Na 2025 Aruba ta den un situacion cu un Gobierno nobo ta prepara pa tuma mando di Aruba, cu bou mando di dos Gobierno Wever-Croes a bira un pais sumamente atractivo pa goberna, pasobra Gobierno Wever -Croes ta entrega na su sucesor un pais cu un caha yena cu placa como herencia.
1985 a entrega no solamente Aruba pero mundo e mensahe con esfuerzo di otro por bira logro di enemigonan di e persona cu ta responsabel pa e logro grandi.
Na 1985 Aruba a conoce e momento cu e tata di Status Aparte mester a entrega tur titulo gubernamental na su opositornan cu tabata di fiesta ora Prome di Januari 1986 a anuncia su mes como entrada pa Status Aparte y Betico Croes mes tabata despedi pa semper di e pais.
Na e momentonan aki Aruba ta conoce ripiticion di e storia di 1986 na momento cu Gobierno Wever-Croes mester entrega na Mike Eman, un Aruba cu a recupera for di e desastre cu Mike Eman a laga atras.
Gobierno Evelyn Wever-Croes ta ripiti historia na momento di su despedida y ta entrega na e proximo gobierno, cu tabata opositor di su maneho, e caha di placa bon yena di Aruba pa asina e proximo Gobierno por celebra loke Gobiernonan Evelyn Wever-Croes a logra.
Asina historia di 1985 cu mundialmente a bira un ehempel di loke mundo politico realmente ta, lo ripiti su mes na 2025 ora e logro di gobiernonan Evelyn Wever-Croes lo keda entrega na gobierno dirigi pa Mike Eman, cu ta e persona cu a laga caha di Aruba bashi y a haci cu Aruba a perde su derecho riba Status Aparte real y a wordo humilia cu supervision, cu lo bira realidad di e proximo Gobierno di Aruba tambe!
