ORANJESTAD (AAN): E certamen final a tuma lugar Diadomingo cu a pasa. Sinembargo keto bay tin for di tur skina di mundo,
comentarionan ta plamando encuanto e evento. Ainda tin fanaticonan cu ta insisti cu ta Peru mester a gana. Otronan ta para ariba cu ta Brasil mester a bay cu e corona. Sin papia mes di esnan cu ta kere cu India mester a haya e premio.
Pero awor ta prensa internacional ta cuminza duna nan comentario riba loke nan a mira siman pasa riba stage di Seminole Hard Rock Hotel & Casino Hollywood na Florida. Nan conclusion ta cu “originalidad” a laga hopi di desea den e diseñonan di Trahenan di Gala.
Pa colmo, mayoria di e 74 candidatanan a subi un bisti similar cu paña habri na nan pianan, un fit extremo, glitter y cantidad di rhinestone.
Bon mes cu varios candidata a subi escenario cu algo diferente. E candidata Kimberly Jimenez di Republica Dominicana, a subi cu un diseño elegante di Gustavo Arango di color blanco y diseñonan riba e falda.
E representante di Thailandia, Amanda Obdam, a luci diferente y sencual cu un diseño cu detayenan di oro. Mientras cu e candidata di South Korea, esta Hari Park tabata un otro candidata cu a destaca cu su trahe hopi elabora den peacock blue rhinestone cu a pas cune. Sin lubida Estefania Soto Torres di Puerto Rico, cu a destaca ora di subi escenario cu un diseño original y bunita color berde cu tabata full for di e normal.
Ademas di Helen Hernandez, por a mira cu e trahe di gala di Chantal Wiertz di Curacao a destaca hopi, como tambe esun di Sarita Reth di Cambodia, Laura Victoria Olascuaga di Colombia, Adline Castelino di India, Miqueal-Symone Williams di Jamaica, Thuzar Wint Lwin di Birmania, Janick Maceta del Castillo di Peru, Rabiya Mateo di Filipinas, y Alina Sanko di Rusia.
Algun candidata cu a usa un trahe cu no a cuadra cu e certamen, tabata Bernadette Belle Ong di Singapore, cu a opta pa un trahe fucsia cu un strik riba schouder cu casi no a lage cana drechi riba stage. Tambe esun di Klara Vavruskova di Republica Checo, kende su diseño tabata comparable cu e halanan di un zwaan.
Tabatin algun candidata cu a bisti trahenan sin ningun gracia y tabata demasiado simple mescos cu e candidatanan, manera Blerta Veseli di Kosovo, Radinela Chusheva di Bulgaria, y Kamila Serikbai di Kazakhstan.
E briyo di e bistir di Cecilia Rossell di Honduras, como tambe esun di Anthea Zammit di Malta, tabata un poco excesivo, y tabata briya manera spiel.
Pero esey tabata djis opinion di varios periodista internacional.