ORANJESTAD (AAN) – Dialuna 18 di Mei aki, na Pro Catedral, Misa San Francisco na Playa, a tuma lugar e develo di e busto di Papa San Juan Pablo II, na e parti dilanti di e Misa.
Minister Presidente a dirigi palabra na tur esnan cu tabata presente, y a gradici pa e bunita ceremonia cu a tuma lugar.
E busto aki di Papa San Juan Pablo II, e mandatario a expresa ta esun prome na Aruba y kizas den Caribe Hulandes.
E dignatario a bisa cu esaki ta mustra e aprecio cu na Aruba e poblacion ta sinti pa Papa Juan Pablo II.
E mandatario a comenta cu el a puntra algun persona cu e conoce, kico Papa San Juan Pablo II ta nifica pa nan.
Dos contesta a bin constantemente dilanti: na prome lugar cu e tabata un luchador. Un hende cu bao cualkier circunstancia a lucha pa persevera.
Na di dos, cu Papa Juan Pablo II a inspira nan pa nan practica nan FE hopi mas cu prome. Cu el a inspira un Catolico pa ta mas catolico.
E dignatario a bisa cu esey ta hustamente e aspectonan cu ta identifica nos tur como comunidad di Aruba.
Aruba mescos cu mundo henter a pasa den temponan hopi dificil; e pandemia no tabata facil, el a afecta hopi hende.
Aruba no a sali afo ainda, pero poco, poco nos pais ta logrando si, danki na e bendicion di Dios.
Minister Presidente a expresa cu Aruba ta bendiciona, y compara cu otro paisnan nos ta saliendo for di e pandemia y esey ta pasobra nos hendenan ta luchador, y ta practica nan FE, y tur esaki inspira pa Papa Juan Pablo.
“Mi no ta kere den casualidad den bida. Tur cos ta pasa pa un motibo, y awe nos ta akinan pa nos recorda e gran persona aki cu ta sigui inspira nos. Nos ta den e pandemia ainda, pero cu e spirito di luchado cu semper e tabata tin y perseverancia y e FE grandi cu ta inspira hasta otronan, ohala FE ta yuda nos pa na Aruba tambe nos por logra cosnan grandi. Pabien na henter e comunidad di Aruba, pero specialmente e Parokia di Playa cu e bunita plaza aki, y mi ta spera cu sigur e lo inspira hopi, hopi hende, den nos comunidad”, Prome Minister a conclui.
