Feliz Dia awe di Prensa
ORANJESTAD (AAN) Awe 1 di September 2025, na Aruba ta observa ‘Dia di Prensa’. E no ta djis un dia pa observa y analisa loke ta pasando cu libertad di prensa y atakenan, pero tambe corda cu libertad di prensa no nifica ‘libertinahe di prensa’, y tambe corda cu e tarea principal ta pa defende e bos di pueblo y tambe defende Democracia, pa e keda bibo. Libertad di prensa pesey ta inherente na democracia.
Libertad di expresion por wordo splica di e forma aki, unda ciudadanonan por comunica y expresa nan mes liber, danki na e derecho fundamental pa biba den un sociedad husto y habri, cu ta e basenan di un democracia.
E derecho na expresa, difundi, busca, haya y comparti informacion, como tambe idea y sugerencianan sin miedo na represalia ilegal di un sistema, ta esencial den un pais unda un nivel halto di educacion ta clave den e desaroyo di su ciudadanonan como ser humano, como individuo y como comunidad cu tin acceso na e husticia y cu por disfruta di tur y cada un di e derechonan cu ta aparece den e “Declaracion Universal di e Derechonan Humano”.
Awe, Dialuna 1 di September, Aruba ta celebrando Dia di Prensa, y cada bez, cada aña, ta hopi importante pa reflexiona riba e tema di libertad di expresion no como parti di e democracia, sino como pilar di e democracia.
Y ta tarea di tur hende envolvi den e trabao di busca informacion, haci investigacion, redacta, difundi, defende un causa, etc., semper ehecuta su labor den defensa e libertad di expresion como democracia y no wak e como parti di dje, incluso ora di promociona su medio di comunicacion.
