Minister di Enseñanza Gerlien Croes;
- El a wak esaki den un ahuste di les na un scol na San Nicolas
ORANJESTAD (AAN) Minister Gerlien Croes, encarga cu e cartera di Desaroyonan di Enseñanza, den entrevista cu DIARIO a expresa cu Instituto Pedagogico Arubano (IPA), ta traha duro, y cu ta haci su best.
E ta kere tambe cu kizas mester busca un manera di haci e estudio di maestro mas atractivo, pa e bira mas interesante pa mas hende studia pa maestro.
Di otro banda, e no ta facil pa bo give up tampoco, cu tur e desaroyonan cu continuamente tin rond mundo, den enseñanza.
“Cambionan den onderwijs ta pasando di un dia pa otro, pues hopi lihe. Ami ta bao un super bon impresion, positivamente, cu docentenan cu ta cabando IPA, hopi di nan ta hopi creativo”, e dignatario a señala.
Recientemente, el a bishita un scol na San Nicolas, unda el a wak un recien ahuste di les, unda e muchanan ta traha cu diferente tools, y e docentenan ta purba di actualiza. “Nos mester ta mas flexibel cu onderwijs. Antes nos tabata hopi mara na cumpli cu cierto cantidad di ora per les, esta ‘lesuur’, anto nos tin cu ta un tiki mas abierto.
“Nos tin cu ta un tiki mas habri pa inculca den nos curriculum cosnan cu ta mas moderniza, otro manera di pensa. Dus, nos ta bay sinta cu IPA, y nos a cuminza combersa cu nan inoficialmente, pero awor si nos ta bay tin un reunion oficial cu nan, y sigui combersa di esaki. Nos tin cu structura onderwijs hopi miho”, Minister Gerlien Croes a señala.
