Prensa a bay haci un site-inspection di edificio nobo di USA Departures

Gateway 2030 moviendo den bon direccion

• Enfoke lo bay ta riba Self Service Check-In 

ORANJESTAD (AAN): E proyecto di ‘Gateway 2030’ pa amplia Aeropuerto di Aruba ta bayendo den bon direccion.  Di e forma aki, ta tratando di elimina tur ‘bottlenecks’ cu pasaheronan ta confrontando cune actualmente debi cu e lugar no por domina e fluho fuerte di pasahero.

   E proyecto di Gateway 2030 ta representa un inversion significante pa moderniza y inova Aeropuerto di Aruba pa sobrepasa e dificultad pa capacidad, y yuda asina pa e bira un Aeropuerto di clase mundial.

   E proyecto ta bay den Fase, y aworaki por mira cu Fase 1A ta kedando cla.  E ta inclui un sala grandi di check-in pa vuelonan rumbo pa Merca, un espacio nobo pa maleta, y oficinanan di Aerolinea.

   Tin varios Self-Service Check-In ademas di multitud di counters pa pasaheronan por entrega nan maleta, etc.

   Riba Diaranson, prensa a wordo invita pa haci un ‘Site Inspection’ di e lugar aki.  Prensa a wordo yama bon bini door di Barbara Brown, kende mesora a introduci Marilou van der Linden, kende ta Operations Manager na Aeropuerto, y a splica riba con nan ta kedando cla pa operacion cuminza den e partinan nobo, y tambe con cada proceso a pasa via fasenan.

   Na luna di Maart nan tabatin fasenan critico cu a tuma lugar, sigui pa April, y yega un etapa na luna di Mei.

  Nan ta enfocando hopi riba ORAT, cu nifica ‘Operation Readiness Activation and Transition’.  Nan ta hayando asistencia di e compania Chrysalis Global Consulting cu ta un specialista di ORAT, cu ta yuda Aeropuerto di Aruba pa check si nan ta full cla pa cuminza opera den e partinan aki.  Cu esaki nan a informa tur aerolinea y groundhandlers tambe riba e asunto.  Nan tur a bay den e planning, pa asina nan wordo informa ta con e sistema lo cambia, con lo tin di haci un forma nobo di traha.

   E focus principal den e Sala di Check-in aki ta riba ‘Self-Service’ na e diferente computernan poni pa pasaheronan mes check-in pa nan vuelo.  Esey ta un forma nobo di traha, cu tur empleado tin di bay ta costumbra cune.

   Ora cu bo yega na e edificio nobo di Check-in aki, bo ta mira un caminda traha su dilanti cu ta dirigi unicamente na e edificio aki pa vuelonan USA Departures.  Asina cu bo sali di e Spiral Rotonde di Green Corridor y bo drenta tereno di Aeropuerto, lo bay tin un caminda nobo special pa bo bay na e edificio aki di check-in pa vuelonan Mericano.  Pues tur pasahero rumbo pa Merca, lo tin di bay pasa riba e caminda aki.

   Lo bay tin un Y-splitsing cu ta pa trafico cu ta dirigi su mes pa e edificio di ‘International Flights’.