ORANJESTAD (AAN): Game Night Girls, un grupo di dama cu banda di nan gamenights regularmente y de bes en cuando tambe ta organisa Gamenight grandi,
a logra un meta tremendo cu nan quiz creativo. Un di e tareanan cu e lider di e quiz a traha, tabata pa cada persona recauda fondo pa un bon causa na Aruba. Nan a scohe pa duna apoyo na FAVI, e fundacion pa personanan ciego y cu bista limita, cu ta den proceso pa recauda fondo pa un proyecto di masashi cu lo cuminsa den Juni benidero. Nan meta tabata pa recauda Afl. 8.000,00 pa por financia e proyecto, y nan a logra e meta aki! E persona cu a logra recauda e cantidad mas halto tabata gana mas punto na Gamenight, pero e obhetivo tabata hopi mas grandi cu solamente gana un competencia.
Cu hopi creatividad, e damanan a organisa diferente actividad pa por recauda e fondo aki. Den total nan a logra recauda Afl. 5.143,15. Entre otro, nan a organisa un torneo di beach tennis, un Blind Tasting den un restaurant local, un sorteo pa un weekend stay gratuito, juffrouwnan a colecta cu nan studiante y nan a tene un rifa cu premio espectacular. Pero e esfuerso aki no a keda aki. Varios empresa tabata inspira y entusiasma pa e iniciativa, y nan a dicidi di haci un donacion tambe, aumentando e total di donacion na Afl. 8.000,-
Durante e presentacion di e donacion, tabata presente Cetty Baarh (directora di FAVI), Sary Wernet (terapista di revalidacion) y Dani Boekhoudt (un cliente ciego). Via di un presentacion di video, nan por a mira con e Game Night Girls a trece nan ideanan na bida, cu hopi placer y esfuerso. E tabata un momento hopi special y emocional. No solamente e cantidad final tabata impresionante, pero tambe e impacto cu e actividad tabatin ariba e damanan tabata hopi valioso. Nan a realisa cu nan por realmente haci un diferencia den bida di otro hende, algo cu ta mas importante cu cualkier suma di placa.
FAVI ta enormemente gradici pa e donacion maraviyoso aki. E cantidad recolecta ta un parti importante di e proyecto. Tin mas donadornan, incluyendo apoyo for di Hulanda, pa asina e proyecto por keda realisa completamente. E iniciativa aki ta duna personanan ciego y cu bista limita un oportunidad unico pa siña y disfruta di masashi, ricibi un diploma reconoci y hasta habri porta pa mas oportunidad di trabou den futuro.
{gallery}Game Night Girls ta recauda Afl. 8.000, pa FAVI{/gallery}
