ORANJESTAD (AAN): E hoben Angela Geerman di 14 aña di edad lo ricibi un premio di estimulo pa su meritonan riba tereno social.
Angela a forma parti di e Proyecto Gen297, un programa despues di oranan di scol pa hobennan di scol secundario auspicia pa Asociacion Trabou di Hubentud pa Aruba (ATHA). Meta di e proyecto ta pa yuda hobennan desaroya nan personalidad, habilidad y conocemento. Un otro aspecto tabata pa guia nan hunto cu nan mayornan.
Angela a mustra cu e tin talento pa domina e instrumento di cuarta. Pero loke mas a resalta ta cu durante e lesnan, Angela tabata yuda e otro hobennan cu no por a domina e instrumento. E tabata keda despues di e programa pa yuda haci cushina limpi. Den e proyecto Gen297, Angela tabata un participante y tambe un boluntario. E ta un alumno di Colegio Arubano y a yuda hobennan di otro scol manera di Scol pa Preparacion pa Ofishi cu huiswerk.
Asina el a yuda un hoben, cu cifranan no desea, mehora su prestacionnan na scol cu a duna un resultado cu e hoben a gradua entre e mihornan. Tambe e tabata motiva otro hobennan cu tin problema social. Angela a influencia un hoben cu a resulta di a dicidi pa stop di uza substancia adictivo pisa. Pues un hoben cu ta dispuesto pa yuda, comparti y influencia otro pa bay den e caminda corecto cu ta balornan grandi riba tereno boluntario y social. Angela tabata hunga futbol tambe pa La Fama damas.
E aña aki Angela a participa den e Proyecto “Aruba Doet” pa yuda verf e edificio di ATHA na Santa Cruz. Asina cu oportunidad presenta, y tabata boluntario pa otro proyectonan pa instancianan no-gubernamental. Angela ta conoci pa tin un empatia impresionante cu su amigo y amiganan cercano, un caracter hopi bunita y un ehempel pa otro hobennan comparti, yuda otro y guia otro den e caminda corecto. Angela ta siguiendo training di cosmotologia facial y a wordo escogi entre 6 participante como e mihor pa sigui cu e practica na e salon di estetica.
Pa su prestacionnan riba tereno social como influencer positivo y como un boluntario hoben, Angela lo ricibi e premio estimulo di Copa Hubenil Gobernador Felipe B. Tromp Diahuebs awor for di Gobernador den Wilhelmina Park.
