Na Biblioteca a tene un tayer exitoso di Fli cu hopi informacion balioso

ORANJESTAD (AAN): Diaranson atardi Comision Celebracion Dianan Nacional, Ministerio di Cultura y Biblioteca Nacional a organiza un tayer pa muchanan siña traha fli.

E meta di e tayer ta pa motiva nos muchanan pa sigui cu e bunita tradicion di hisamento di fli cu Ministerio di Cultura kier sigui apoya.

   E tayer tabata bon atendi cu 55 hoben cu a haya un demostracion con nan por traha nan propio fli. E tayer a worde duna pa sr. Julio Werleman kende tin mas di 50 aña trahando fli. Hunto cu su asistente señora Jarianne Dijkhoff, nan a percura pa presenta e tayer y duna e muchanan tur informacion con ta traha fli.

   Entrante diabierna 21 april tur fli cu a worde traha lo ta den un exposion na Biblioteca Nacional na George Madurostraat, durante orario di servicio publico. E exposicion aki lo keda te cu diamars 25 di april. Despues di e fecha aki muchanan ta haya nan fli pa subi riba Dia di Rey.

  Un gradicimento special ta bay na señora Astrid Britten directora di Biblioteca Nacional Aruba, como tambe empleado di biblioteca señora Glenda Zavala pa coordina e tayer. Danki na sr. Julio Werleman, tambe su asistente, cu a siña e muchanan con ta traha fli y tambe a conta e muchanan un poco di e tradicion di hisamento di fli.

   Na final di e tayer Minister di Cultura señora Xiomara Maduro hunto cu directora di Biblioteca Nacional señora Astrid Britten a haci entrega di certificado na tur muchanan cu a participa.